ރައީސްގެ ރައްދު މޮރިޝަސްއަށް: ގުޅުން ކަނޑާލިޔަސް މޮރިޝަސްއަށް ހައްގު ނޫންތަނެއް ނުލިބޭނެ!

މޮރިޝަސްއިން ރާއްޖެއާއިއެކު އޮތް ހާރިޖީ ގުޅުން ކަނޑާލިކަމުގައިވީނަމަވެސް އެގައުމަށް ހައްގު ނޫންތަނެއް ނުލިބޭނެ ކަމުގައި ވިދާޅުވެ މޮރިޝަސް ސަރުކާރުގެ ނިންމުމަށް ރައީސް ޑރ މުހައްމަދު މުއިއްޒު ފާޑުވިދާޅުވެއްޖެ އެވެ.

ރައީސް މިބީދައިން ވާހަކަފުޅު ދެއްކެވީ އެމަނިކުފާނު ފެއްޓެވި ސިލްސިލާ ނޫސްވެރިންގެ ބައްދަލުވުންތަކުގެ ތެރެއިން މިއަދު ހެނދުނު ބޭއްވި ފުރަތަމަ ނޫސްވެރިންގެ ބައްދަލުވުމުގައި އެވެ.

ރައީސް ވަނީ ރާއްޖޭގެ ކަނޑުގެ ސަރަޙައްދު ހޯދުމަށް ކުރަމުންދާ މަސައްކަތްތައް މިހާރުވެސް ކުރިއަށްދާ ކަމަށާއި، އެކަމަށްޓަކައި ހުށަހަޅަންޖެހޭ މައްސަލަތައްވެސް ހުށަހަޅުއްވާނެކަން މިއަދުވެސް ތަކުރާރުކުރައްވާފައި އެވެ. މި މަސައްކަތުގެ ތެރެއިން ރާއްޖެ އާއި އެކު އޮތް ހާރިޖީ ގުޅުން ކަނޑާލަން މޮރިޝަސް އިން ނިންމާފައިވާ ނިންމުމަށް އަލިއަޅުވާލައްވައި ރައީސް ވިދާޅުވީ، އެ ނިންމުމަކީ ތާކުންތާކު ނުޖެހޭ އަދި "އިމެޗުއަރ" ނިންމުމެއް ކަމަށެވެ.

އަދި ރާއްޖެއަކީ ޗާގޯސްގެ ޙައްޤުވެރި ފަރާތް ކަމަށާއި އެގައުމުން ރާއްޖެއާއިއެކު ސިޔާސީ ގުޅުން ކަނޑާލިޔަސް އެގަުމަށް ޙައްޤު ނޫން ތަނެއް ޙައްޤެއް ނުވާނެ ކަމުގައި ރައީސް ވިދާޅުވިއެވެ.

ރާއްޖެ އާއި މޮރިޝަސްއާއި ދެމެދު އޮތް ހާރިޖީ ގުޅުން ކަނޑާލަން އެގައުމުން ނިންމައި އެކަން އިއުލާނުކުރީ މިދިޔަ ހަފްތާ ބަންދުގައި އެވެ. އެގޮތުން މޮރިޝަސްއިން އެނިންމުން ނިންމީ ރާއްޖެއިން ޗާގޯސް ހޯދުމަށް ކުރަމުންދާ މަސައްކަތާއި ގުޅިގެންނެވެ.