ކުދި ވިޔަފާރިތަކަށް ސަރުކާރުން ދޫކުރަންޖެހޭ 200 މިލިއަނެއްހާ ރުފިޔާ އަންނަ ހަފްތާގައި ދޫކުރާނެ - ރައީސް

ކުދި ވިޔަފާރިތަކުން ސަރުކާރުގެ ވުޒާރާތަކާއި ކުންފުނިތަކަށް ފޯރުކޮށްދީފައިވާ ހިދުމަތްތަކަށް ދޫކުރަން ޖެހޭ ފައިސާ އަންނަ ހަފްތާގައި ވެސް ދޫކުރާނެކަމަށް ރައީސުލްޖުމްހުރިއްޔާ ޑރ މުހައްމަދު މުއިއްޒު ހާމަކުރައްވައިފި އެވެ.

ރައީސް މިފަދައިން ހާމަކުރެއްވީ މިހާރު ރައީސް އޮފީހުގައި ކުރިޔަށްދާ ނޫސްވެރިންގެ ބައްދަލުވުމުގައި އެވެ.

ރާއްޖޭގެ އިޤްތިޞާދީ ހާލަތު އޮތީ ރަނގަޅަށްކަމަށާއި ރާއްޖޭގެ އިޤްތިޞާދީ ހާލަތު މެނޭޖްކުރަމުންދަނީ ރާއްޖެއިން ބޭރަށް ދައްކަން ހުރި ދަރަނި ދެއްކޭގޮތައްކަމުގައި ފާހަގަކުރައްވައި ރައީސް ވަނީ ދަރަނި ދައްކަމުންވެސް ސަރުކާރުން އެކިއެކި ފަރާތްތަކަށް ދޭންޖެހޭ ފައިސާވެސް ދެމުންދާކަން ފާހަގަކުރައްވާފައި އެވެ،.

އެގޮތުން ރައީސް ވިދާޅުވީ ކުދި ވިޔަފާރިތަކަށް ސަރުކާރުން ދޫކުރަންޖެހޭ ފައިސާ މިހާރުވެސް ދޫކުރަމުން އަންނަ ކަމަށާއި އަންނަ ހަފްތާގައިވެސް އެގޮތަށް ދޫކުރަންޖެހޭ ގިނަ އަދަދެއްގެ ފައިސާ ދޫކުރަން ނިންމާފައިވާ ކަމަށެވެ. މިގޮތުން 1 މިލިއަން ރުފިޔާއަށްވުރެ ކުދި ބިލްތަކަށް، ޖުމުލަ 200 މިލިއަން ރުފިޔާ ދޫކުރާނެ ކަމުގައި ރައީސް ހާމަކުރެއްވި އެވެ."ކުރިއަށްއޮތް ހަފުތާއަކީވެސް މިގޮތުން ކުދި ވިޔަފާރިތަކަށް ރާއްޖޭގައި މަސައްކަތްކުރާ ކުދި ވިޔަފާރިތަކުން ނުވަތަ ކުންފުނިތަކުން ސަރުކާރުން ކޮށްފައި ހުރި މަސައްކަތްތަކަށް ދޭންހުރި ފައިސާގެ މަދުވެގެން 200 މިލިޔަން ރުފިޔާ ދޭނެ ހަފުތާއެއް. ކޮންމެ ހަފްތާއަކުވެސް ކޮންމެވެސް އަދަދެއް އެބަދެން. އަޅުގަނޑުމެން އިސްކަން މިދެނީ ކުދި އެމައުންޓްސްތަކުން ޕޭކުރަންހުރި ވެންޑާސްތަކަށް." ރައީސް ވިދާޅުވިއެވެ.

ކުދި އަދި މެދު ފަންތީގެ ވިޔަފާރިތައް މާލީ ގޮތުން ކުރިއެރުވުމަށް މިދިޔަ އަހަރުގެ ތެރޭގައިވެސް އެ ފަރާތްތަކަށް ފައިސާ ދޫކުރުމަށް ގިނަގުނަ މަސައްކަތްތަކެއް ސަރުކާރުން ކޮށްފައިވާއިރު ސަރުކާރުން ރާއްޖޭގެ ވިޔަފާރިތަކުގެ ބިލުތަކަށް މިދިޔަ އަހަރު އެކަނިވެސް ސަރުކާރުން 6.3 ބިލިޔަނަށްވުރެ ގިނަ ރުފިޔާ ދައްކާފައިވެއެވެ.