ޣައްޒާގެ ފުލުހުންގެ މައި މަރުކަޒަށް ޔަހޫދީން ބޮން އަޅައިފި: 3 ފުލުހަކު ހިމެނޭހެން 7 މީހަކު ޝަހީދުވެއްޖެ

ޣައްޒާގެ ފުލުހުންގެ މައި މަރުކަޒަށް ޔަހޫދީން ބޮން އަޅައިފި އެވެ.

ރިޕޯޓުތައް ބުނާގޮތުގައި ޔަހޫދީން މިސައިލް ހަމަލާތަކެއް ދީފައިވަނީ ޣައްޒާގެ ޝެއިޚް ރަދްވާން އަވަށުގައި ހުންނަ ފުލުހުންގެ މައި މަރުކަޒަށް އަމާޒުކޮށެވެ.

އެގޮތުން މި ހަމަލާގައި 7 މީހަކު ޝަހީދުވެފައިވާކަން މިހާތަނަށް ކަށަވަރުވެފައިވާއިރު އޭގެ ތެރޭގައި ހިމެނެނީ 3 އަންހެން ފުލުހަކާއި 4 ގައިދީއެކެވެ.

މި ހަމަލާއާއިއެކު އިސްރާއީލުން ޣައްޒާއަށް ދިން ހަމަލާތަކުގައި މިއަދުގެ މިވަގުތާއި ހަމައަށް ޝަހީދުވި މީހުންގެ އަދަދު 17 އަށްވަނި އަރާފައި އެވެ.

ޣައްޒާގެ ހަބަރުތައް އެންމެ ތާޒާ ކަމާއިއެކު ގެނެސްދޭ ގުދުސް ނިއުސް އޭޖެންސީއިން ވަނީ މިއަދު ހެނދުނު ޔަހޫދީން ޣައްޒާގެ ޚާން ޔޫނުސްއަށް ވަރުގަދަ ހަމަލާއެއްދިންކަން ރިޕޯޓުކޮށްފައެވެ. އެގޮތުން އަލް މަސާވީ ރެފިއުޖީ ކޭމްޕާއި ކައިރިއަށް ދިން މި ހަމަލާގައި ކުޑަކުދިންތަކެއްވެސް ޝަހީދުވެފައިވާކަމަށް ރިޕޯޓުތައް ބުނެއެވެ.

2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު އިޒްރޭލުން ޣައްޒާގެ ރައްޔިތުންނާއި ދެކޮޅަށް ހަނގުރާމަ ފެށުނު ފަހުން ޣައްޒާއިން ޝަހީދުވި ޖުމުލަ މީހުންގެ އަދަދު 71،769 އަށްމިހާރު ވަނީ އަރާފައި އެވެ.