ސަރުކާރުގެ އަމާޒަކީ ގަން އެއާޕޯޓަކީ ދެކުނުގެ ވައިގެ ހަބު ކަމުގައި ހެދުން - އަމީން

ރައީސުލްޖުމްހުރިއްޔާ ޑރ މުހައްމަދު މުއިއްޒުގެ ސަރުކާރުގެ އަމާޒަކީ ސަރުކާރުގެ އަމާޒަކީ ގަން އެއާޕޯޓަކީ ދެކުނުގެ ވައިގެ ހަބު ކަމުގައި ހެދުން ކަމަށާއި މިހާތަނަށް އެކަން ވެފައި ނެތީ އެކަށީގެންވާ މިންވަރަށް އެއާލައިން އޮޕަރޭޓް ކުރުމަށް ކުރަންޖެހޭ މަސައްކަތް ކޮށްފައި ނެތުމުން ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.

އަމީން މިފަދައިން ވިދާޅުވީ ދެކުނުގެ 4 އަތޮޅު ވައިގެ ދަތުރުން ގުޅާލުމަށްތަކައި މިއަދު ގަމުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައި އެވެ.

އަމީން ވިދާޅުވީ ގަން އިންޓަރނޭޝަނަލް އެއާޕޯޓަކީ ދުނިޔޭގެ ކޮމާޝަލް އެއާލައިންތަކުގައި ބޭނުންކުރާ ހުރިހާ ސައިޒެއްގެ މަތިންދާ ބޯޓު އޮޕަރޭޓް ކުރެވޭނެ ކެޕޭސިޓީ ހުރި އެއާޕޯޓެއް ކަމަށާއި ނަމަވެސް މިހާތަނަށް އެފަދަ މާޙައުލެއް ޤާއިމުވެފައި ނެތީ އެކަށީގެންވާ މިންވަރަށް އެއާލައިން އޮޕަރޭޓް ކުރުމަށް ކުރަންޖެހޭ މަސައްކަތް ކޮށްފައި ނެތުމުން ކަމަށެވެ. އަދި މިއަދު ފެށިގެން ދިޔަ މިފަދަ އެއަރ ކަނެކްޓިވިޓީ ވަސީލަތެއް ޤާއިމުކުރުމުން ދެކުނުގެ ޓޫރިޒަމް ސްކޯޕް ބޮޑުވެގެންދާނެ ކަމަށްވެސް މިނިސްޓަރު ވިދާޅުވިއެވެ.

ގަން އެއާޕޯޓަށް މެދުއިރުމަތީގެ އެއާލައިނަކާއި، ޗައިނާގެ އެއާލައިނެއް ނައުމަށް މަސައްކަތް ކުރައްވަމުންދާކަން ހާމަކުރައްވައި އަމީން ވިދާޅުވީ ގަމަށް ބޮޑެތި ކޮންސެޝަންތަކެއް ދީގެން ނަމަވެސް އެއާލައިންތައް އެއާޕޯޓަށް ގެންނަން އެބަޖެހޭ ކަމަށާއި އަދުގެ ސަރުކާރުން އެމަސައްކަތަށްކޮށް އެ އެއާޕޯޓުގެ ހާލަތު ބަދަލު ކުރާނެ ކަމަށެވެ.

" މި އެއާޕޯޓަކީ އެއާލައިންތައް އަންނަ ރާއްޖޭގެ ވައިގެ ސަދަން ހަބު ކަމުގައި އަޅުގަނޑުމެން ހަދާނަން،" ދަތުރުފަތުރާ ބެހޭ ވަޒީރު ވިދާޅުވިއެވެ.

މިއަދު ދެކުނުގައި ފެށިގެން ދިޔަ ހިދުމަތަށް އިޝާރާތްކުރައްވައި އަމީން ވިދާޅުވީ ދެކުނުގެ އަތޮޅުތަށް ވައިގެ މަގުން ގުޅާލުމުން އެ އަތޮޅަށް އެކި ގޮތްގޮތުން ފައިދާ ކުރާނެ ކަމަށެވެ. އެގޮތުން ލޯކަލް ޓޫރިޒަމް ހިމެނޭހެން ސަރަޙައްދުގެ އިޤްތިސާދަށް މިހިދުމަތާއިއެކު އެކަށޭނަ ދިރުމެއް ލިބިގެންދާނެކަން މިނިސްޓަރު ފާހަގަކުރެއްވި އެވެ.

ރާއްޖޭގައި ސީޕްލޭން ހިދުމަތް ދޭން ބޭނުންކުރާ ޓްވިން އޮޓަރ މަރުކާގެ ބޯޓުތަކުގައި ފުރޮޅު ހަރުކޮށް އެއާޕޯޓުތަކަށް ޖެއްސޭ ގޮތް ހަދައި ދެކުނުގެ 4 އަތޮޅު ވައިގެ ދަތުރުން މިއަދު ގުޅާލިއިރު މި ހިދުމަތް ދޭން ނިންމާފައިވަނީ 5 ސެކްޓާރއަކަށެވެ. އެއީ އައްޑޫ ގަމުން ހުވަދު އަތޮޅުގެ ކާޑެއްދޫ އަދި ކޫއްޑޫ އެއާޕޯޓުގެ އިތުރުން ފުވައްމުލަކަށް ދަތުރު ކުރާ ގޮތަށާއި ފުވައްމުލަކުން ކާޑެއްދޫ އަދި ކޫއްޑޫއަށް ދެވޭ ގޮތަށެވެ.

އަދި މުަސްތަގްބަލުގައި ހުވަދު އަތޮޅުގައި މިހާރު ހިނގަމުން އަންނަ މާވަރުލު އެއާޕޯޓާއި ފަރެސްމާތޮޑާ އެއާޕޯޓުވެސް މި ހިދުމަތުގެ ތެރެއަށް ގުޅާލެވިގެންދާނެކަން މިނިސްޓަރު ފާހަގަކުރެއްވި އެވެ.