އިންތިޚާބަށް ކުރިމަތިލުމަށް ފޯމު ހުށަހަޅަން ކަނޑައަޅާފައިވާ ގަޑި އިތުރުކޮށްފި

ކުރިޔަށް އޮތް ލޯކަލް ކައުންސިލް އިންތިޚާބަށް ކުރިމަތިލުމަށް ފޯމު ހުށަހަޅަން ކަނޑައަޅާފައިވާ ގަޑި އިތުރުކޮށްފިއެވެ.

އިންތިޚާބަށް ވާދަކުރުމަށް ފޯމު ހުށަހަޅަން ޖެހެނީ، އިލެކްޝަންސް ކޮމިޝަންގެ މައި ޕޯޓަލް މެދުވެރިކޮށެވެ. ފޯމު ހުށަހެޅުމުގެ ފުރުޞަތު މި މަހުގެ 17ވަނަ ދުވަހު ހުޅުވާލާފައިވާއިރު، ޕޯޓަލް މެދުވެރިކޮށް ފޯމު ބަލައިގަންނަ ވަގުތު ކަމުގައި ކަނޑައަޅާފައިވަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން މެންދުރު 15:30އަށެވެ. އަދި ހުކުރު ދުވަސްތަކުގައި މެންދުރު 15:30 އިން 18:00 އަށެވެ.

އިލެކްޝަންސް ކޮމިޝަނުން މިއަދު. ބުނީ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އަށް ކުރިމަތިލުމަށް އެދޭ ފަރާތްތަކުގެ ފޯމު އޮންލައިންކޮށް ކޮންމެ ދުވަހަކު ހުށަހެޅޭނެ ވަގުތު 2 ގަޑިއިރަށް އިތުރުކޮށްފައިވާ ކަމަށެވެ.

އެގޮތުން މި ބަދަލާއިއެކު މިއަދުން ފެށިގެން، 2026 ފެބުރުވަރީ 1 ވާ އާދިއްތަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 17:30 އަށް އަދި ހުކުރު ދުވަހު މެންދުރުފަހު 03:30 އިން ރޭގަނޑު 20:00 އަށް އިތުރުކޮށްފައިވާކަން އެކޮމިޝަނުން ވަނީ ބުނެފައި އެވެ.

އީސީން އިތުރަށް ބުނީ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 އަށް ކުރިމަތިލުމަށް މިހާތަނަށް 2591 ފޯމު ލިބިފައިވާ ކަމަށެވެ.