ފާއިތުވި އަހަރުގެ ތެރޭ ސިޓީ ކައުންސިލުން 31،131 މައްސަލައަށް ޖަވާބުދާރީވެއްޖެ

މާލެ ސިޓީ ކައުންސިލްގެ ކޮމިއުނިޓީ އެންގޭޖްމަންޓް ޔުނިޓުން، 1 ޖެނުއަރީ އިން 31 ޑިސެމްބަރ 2025ގެ ނިޔަލަށް، 31،131 މައްސަލައަކަށް ޖަވާބުދާރީ ވެފައިވާ ކަމަށް ކައުންސިލްގެ ތަފާސް ހިސާބު ތަކުން ދައްކައިފިއެވެ.

ކައުންސިލްގެ ތަފާސް ހިސާބުތަކުން ދައްކާ ގޮތުގައި، ޖަވާބުދާރީ ވެފައިވާ މައްސަލަ ތަކުގެ ތެރެއިން 29،350 މައްސަލަ ނިމިފައިވާއިރު، މައްސަލައިގެ ބާވަތުން ފޮލޯއަޕް ހަދާފައިވާ 1781 މައްސަލަ ހިމެނެއެވެ. އަދި ނަޞޭޙަތް ދެވިފައިވާ 874 މައްސަލަ އާއި ޖޫރިމަނާ ކުރެވިފައިވާ 483 މައްސަލަ ހިމެނޭ ކަމަށް މި ރިޕޯޓްގައި ބުނެފައިވެއެވެ.

މި ރިޕޯޓްގައި ބުނެފައިވާ ގޮތުން ކައުންސިލުން އެންމެ ގިނައިން އެޓެންޑް ވެފައި ވަނީ، ކުނި މެނޭޖްކުރުމާ ގުޅޭ މައްސަލަތަކުގައެވެ. އެގޮތުން، މަގުތަކާއި، ގޯޅިތަކާއި ހުސްބިންތަކަށް ކުނި އެޅުމާ ގުޅޭ 12،652 މައްސަލައަށް ވަނީ އެޓެންޑް ކުރެވިފައެވެ.

ދެ ވަނައަށް އެންމެ ގިނައިން އެޓެންޑް ވެފައިވަނީ އާންމު ރައްކާތެރިކަމާ ގުޅޭ ކަންކަމުގައެވެ. އެ ގޮތުން މިސްކިތްތަކާއި މައިޒާންތައް އަދި ޕާކުތައް ބަލައި ޗެކްކުރުމާ ގުޅޭ 8557 މައްސަލައަކަށް ވަނީ އެޓެންޑް ވެފައެވެ. އަދި ތިންވަނައަށް ވެސް އެންމެ ގިނައިން އެޓްންޑް ވެފައިވަނީ އާންމު ރައްކާތެރިކަމާ ގުޅޭ މައްސަލަތަކުގައެވެ. އެ ގޮތުން މަގުގެ ޕޭޕްމަންޓް، ކާނު، މަގުގެ ގައުތައް، ނޫނީ ތާރަތައް ނެއްޓި ހަލާކުވެފައި ހުރުމާ ގުޅޭ 1133 އަކަށް ވަނީ އެޓެންޑް ވެފައެވެ.

މީގެ އިތުރުން، އާންމު ޝަކުވާތަކުގެ ތެރޭގައި ހިމެނޭ، ފުރާޅު ނޫނީ ދިޔަދޮވި އަދި އެއަރ ކޮންޑިޝަން އައުޑޯރ ޔުނިޓުތަކުން މަގުތަކަށް ފެން ލީކުވުން ނުވަތަ ފެން ތިކިޖެހުމުގެ 1131 ޝަކުވާ ވަނީ ރިޕޯޓް ކުރެވިފައެވެ.

ޖުމްލަ އަށް ކަމެއް އެކުލެވޭހެން، ކޮމިއުނިޓީ އެންގޭޖްމެންޓް ޔުނިޓުން ތައްޔާރު ކުރި މި ރިޕޯޓްގައި ފާހަގަ ކޮށްފައިވާ މައްސަލަތަކުގެތެރޭގައި ހިމެނެނީ، ކުނިމެނޭޖް ކުރުމާއި ޢާންމު ޢިޖްތިމާޢީ މިންގަޑާއި ޚިލާފުވުމާއި، ޤަވާޢިދާ ޚިލާފު ހަރަކާތްތަކާއި ވިޔަފާރީގެ އުސޫލްތަކާ ޚިލާފުވުމާއި، ޢާންމު ޝަކުވާތަކާއި ޢާންމު ރައްކާތެރިކަމާއި ޢާންމު ޞިއްޙަތާއި ޓްރެފިކް އަދި ޕާކިން ވައިލޭޝަނާއި ގުދުރަތީ އަދި ތިމާވެށީގެ މައްސަލަތަކެވެ.

މާލެ ސިޓީގެ މޭޔަރުކަމާ މޭޔަރ އާދަމް ޢާޒިމް ހަވާލުވެ ވަޑައިގެންނެވި ފަހުން، ޢާއްމު ރައްޔިތުންނާ ގުޅުން ހުރި މި ފަދަ މަސައްލަތައް ޙައްލުކުރެއްވުމަށް ވަރަށް ޚާއްޞަ އިސްކަމެއް ދެއްވައެވެ. އެގޮތުން މި މަފަދަ މައްސަލަ ތަކަށް އެޓެންޑް ކުރެއްވުގައި ޢަމަލީ ގޮތުން އެ މަސައްކަތް ކުރައްވާ ތަންތަނަށް ގޮސް މަސައްކަތް ކުރިޔަށް ދާ ގޮތް ބައްލައެވެ.