ހަކަތައިގެ ރައްކާތެރިކަން ކަށަވަރުކުރުމަކީ ޤައުމީ ވިލުންތެރިކަމަށް މުހިންމުކަމެއް -ރައީސް

ހަކަތައިގެ ރައްކާތެރިކަން ކަށަވަރުކުރުމަކީ، ދުރު ރާސްތާގެ އިޖުތިމާޢީ އަދި އިޤްތިޞާދީ ތަރައްޤީއަށާއި ޤައުމީ ވިލުންތެރިކަން ޤާއިމުކުރުމަށް މުހިންމުކަމެއް ކަމުގައި ވިދާޅުވެ، މޫސުމީ ބަދަލުތަކާ ދެކޮޅަށް ބައިނަލްއަޤުވާމީ ފެންވަރުގައި ނަތީޖާ ނެރެވޭނޭފަދަ މަސައްކަތްތަކެއްކުރުމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގޮވާލައްވައިފިއެވެ.

އެމަނިކުފާނު މިކަމަށް ގޮވާލައްވާފައިވަނީ، ބައިނަލްއަޤުވާމީ ފެންވަރުގައި ފާހަގަކުރާ ސާފު ހަކަތައިގެ ދުވަހުގެ މުނާސަބަތުގައި ފޮނުއްވި މެސެޖުގައެވެ.

އެމަނިކުފާނުގެ މެސެޖުގައި ވަނީ، ހަކަތައިގެ ރައްކާތެރިކަން ކަށަވަރުކޮށް، މޫސުމީ ބަދަލުތަކުން ލިބޭ ގެއްލުން ކުޑަކުރުމަށް މަސައްކަތް ކުރުމަކީ، ތަރައްޤީވަމުން އަންނަ ކުދި ޖަޒީރާ ޤައުމުތަކުގެ (ސިޑްސް ގެ) ކުރިއެރުމަށް ލާޒިމުކަމެއް ކަމަށެވެ.

ފާއިތުވެ ދިޔަ ދެ އަހަރު ދުވަހުގެ ތެރޭގައި ދިވެހިރާއްޖޭގައި، އިޔާދަކުރަނިވި ހަކަތަ އުފެއްދުމުގެ ޤާބިލުކަން، ފާހަގަކުރެވޭ މިންވަރަށް އިތުރުކުރެވިފައިވާކަމަށް އެމަނިކުފާނު ވިދާޅުވިއެވެ. އަދި ދިވެހިރާއްޖޭގެ ތިމާވެއްޓާ އެންމެ އެކަށީގެންވާ ފަންނިއްޔާތާ ބެހޭގޮތުން ދިރާސާކޮށް، އިރުގެ އަލިން ހަކަތަ އުފައްދާ ނިޒާމުކަމުގައިވާ، ސޯލާ ޕީ.ވީ ހަރުކޮށް، ބޭނުންކުރުމަށް ވުނަކުރަމުންދާކަމުގައި އެމަނިކުފާނު ވިދާޅުވިއެވެ.

މީގެ އިތުރުން، ހަކަތަ ބޭނުންކުރުމުގައި ކެރުންތެރިކަން އިތުރުކޮށް، ހަކަތައިގެ ދާއިރާގެ ޤާނޫނީ އަދި އިންތިޒާމީ އޮނިގަނޑު އިތުރަށް ހަރުދަނާކުރުމަށް ސަރުކާރުން އަޅުއްވާ ފިޔަވަޅުތަކުގެ މައްޗަށްވެސް އެމަނިކުފާނުގެ މެސެޖުގައި ވަނީ އަލިއަޅުއްވާލައްވާފައެވެ.

މި މަސައްކަތްތަކަކީ، 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިޔާދަކުރަނިވި ހަކަތައަށް ހެދުމަށް އަދުގެ ސަރުކާރުން ކަނޑައަޅާފައިވާ ލަނޑުދަނޑިއަށް ވާސިލުވުމަށް ބާރުދޭ މަސައްކަތްތަކެއްކަންވެސް އެމަނިކުފާނު ފާހަގަކުރެއްވިއެވެ.

ދެމެހެއްޓެނިވި ތަރައްޤީއަށް ސަރުކާރުން ދޭ އަހުމިއްޔަތު ފާހަގަކުރައްވައި، ދިވެހިރާއްޖެއަށް ވިލުންތެރި އަދި ދެމެހެއްޓެނިވި މުސްތަޤުބަލެއް ތަސައްވުރުކުރައްވަމުން އެމަނިކުފާނު ވަނީ، ބޭނުންކުރާ ހަކަތައަކީ ސާފު ހަކަތައަށް ބަދަލުކޮށް، މި ދުނިޔެ ހިމާޔަތްކުރުމަށްޓަކައި، ހުރިހާ މަސްލަހަތުވެރީން އިސްނަގައިގެން، ދުރާލާ، ޖެހިލުމެއްނެތި މަސައްކަތްކުރެއްވުމަށް ގޮވާލައްވާފައެވެ.

ބައިނަލްއަޤުވާމީ ފެންވަރުގައި ފާހަގަކުރާ ސާފު ހަކަތައިގެ ދުވަހުގެ މުނާސަބަތުގައި ރައީސުލްޖުމްހޫރިއްޔާގެ ރަސްމީ އެކްސް އެކައުންޓުންވެސް ވަނީ ދުވަހުގެ ހެޔޮއެދުންތައް ހިއްސާކުރައްވާފައެވެ. އެގޮތުން މި މެސެޖުގައި، ބޭނުންކުރާ ހަކަތަ ސާފު ހަކަތައަށް ބަދަލުކުރުމަކީ އިޖްތިމާޢީ ތަރައްޤީއަށް މަގުފަހިވެގެންދާނެ ކަމެއް ކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ. އަދި މި ސަރުކާރުގެ އަމާޒަކީ، ތިމާވެށްޓާ ރައްޓެހި ހަކަތަ ބޭނުންކުރުމުގެ ނިޒާމުގެ ދަށުން ތަޢުލީމާއި، ޞިއްޙީ ޚިދުމަތާއި، އިޤްތިޞާދީ ފުރުޞަތުތައް ހަރުދަނާކޮށް، ހަކަތައިގެ ރައްކާތެރިކަން ކަށަވަރުކުރުމާއެކު، އިންސާނީ ތަރައްޤީއަށާއި، ރައްޔިތުންނަށް ފޯރުކޮށްދޭ ޚިދުމަތްތައް ހަރުދަނާކުރުންކަން އެމަނިކުފާނު ހާމަކުރައްވާފައިވެއެވެ.

އދގެ ޢާންމު މަޖިލީހުގެ ޤަރާރަކުން، ބައިނަލްއަޤުވާމީ ފެންވަރުގައި ފާހަގަކުރާ ސާފު ހަކަތައިގެ ދުވަހުގެ ގޮތުގައި 26 ޖަނަވަރީ ކަނޑައަޅުއްވާފައިވަނީ، އިންޓަރނޭޝަނަލް ރިނިއުއަބަލް އެނަރޖީ އޭޖެންސީ (އައިރީނާ) ޤާއިމުކުރި ތާރީޚާ ގުޅުވައިގެންނެވެ. މި ދުވަހުގެ މަޤުޞަދަކީ، ދުނިޔޭގައި ބޭނުންކުރާ ހަކަތައަކީ ސާފު ހަކަތައަށް ބަދަލުކުރުމަށް ބައިނަލްއަޤުވާމީ ފެންވަރުގައި ހަރަކާތްތެރިކުރުވުމާއި، ސާފު ހަކަތައިގެ ދާއިރާއިން އުފެއްދުންތެރިކަމާއި، ބައިނަލްއަޤުވާމީ އެއްބާރުލުން އިތުރުކުރުމުގައި 2009 ވަނަ އަހަރުއްސުރެ އައިރީނާއިން އަދާކުރާ ދައުރުގެ އަގުވަޒަންކުރުމެވެ.