ޑާލާ ޕޯޓަލްއަކީ މޯލްޑިވްސް 2.0ގެ ލަނޑުދަނޑިތައް ހާސިލްކުރުމަށް އެހީތެރިވެދޭ ޕޯޓަލެއް: އިހްސާން

ޑާލާ ޕޯޓަލްއަކީ މޯލްޑިވްސް 2.0ގެ ލަނޑުދަނޑިތައް ހާސިލްކުރުމަށް އެހީތެރިވެދޭ ޕޯޓަލެއް ކަމަށް ދާޚިލީ ސަލާމަތާއި ފަންނީއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން، 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕްލެޓްފޯމް އިފްތިތާހްކުރުމަށްޓަކައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މި ރަސްމިއްޔާތުގައި ވާހަކަ ދައްކަވަމުން ވަޒީރު ވަނި ޑާލާ ޕޯޓަލްއަކީ ޓެކްނޮލޮޖީގެ ނަޒަރުން ބަލާއިރު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޑިޖިޓަލައިޒް ތަޞައްވުރު 2.0 ރަމްޒުކޮށްދޭ ޕޯޓަލްއެއްކަން ފާހަގަކުރައްވާފައެވެ.

އަދި މި ތަޞައްވުރުގެ ދަށުން މުއައްސަސާތައް ޒަމާނީ ފެންވަރަށް ތަރައްޤީކޮށް، ޢާންމު ޚިދުމަތްތައް ފޯރުކޮށްދިނުމަށް ޑިޖިޓަލް ވަސީލަތްތަކުގެ މުހިއްމުކަންވެސް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ކާރިސާތައް ރިޕޯޓް ކުރުމާއި އެސެސްމަންޓްތައް ޑިޖިޓަލައިޒް ކުރުމުގެ ސަބަބުން، ޓެކްނޮލޮޖީގެ އެހީގައި ހަރުދަނާ ސިޔާސަތުތައް ނިންމުމާއި، ޖަވާބުދާރީ ކުރުވުމާއި، ރައްޔިތުންގެ އިތުބާރު އިތުރުކުރުމަށް ޓެކްނޮލޮޖީގެ އެހީގައި އެހީތެރިކަން ފޯރުކޮށްދެވޭނެ ގޮތްތައް ޑާލާ ޕޯޓަލް އިން ފޯރުކޮށްދޭނެ ކަމަށެވެ.

ވަޒީރު ވަނީ ޑާލާ" ޕްލެޓްފޯމަކީ ކާރިސާތަކުގައި ލިބޭ ގެއްލުންތައް ރިފޯޓުކުރުން ޑިޖިޓަލްކޮށް، ކާރިސާތަކާ ގުޅޭ ރިޕޯޓްތައް ތައްޔާރުކުރުމާއި ހެކީގެ މައްޗަށް ބިނާކޮށް ނިންމުންތައް ނިންމުމުގެ ނިޒާމު ހަރުދަނާކުރުމަށް ފަރުމާކޮށްފައިވާ ގައުމީ ޑިޖިޓަލް ޕްލެޓްފޯމެއް ކަމަށެވެ.

ޑާލާ ޕޯޓަލް އިފްތިތާހުކުރުމަކީ ގައުމީ ފެންވަރުގައި ކާރިސީ ހިރާސް ބެލެހެއްޓުން ހަރުދަނާކުރުމަށާއި، އަވަސް، އަދި ވިލުންތެރި ރާއްޖެއެއް ބިނާކުރުމަށް އެޅުނު މުހިންމު ފިޔަވަޅެއްކަން ވަޒީރުގެ ވާހަކައިގައި ފާހަގަކުރެއްވިއެވެ.

މި ޕްލެޓްފޯމްގެ ސަބަބުން، މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެއެވެ. އެގޮތުން ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެއެވެ. އަދި ލިބުނު ގެއްލުންތަކުގެ ހިސާބުތައް އޮޓޮމެޓިކުން ތައްޔާރުކުރުމާއި ގެއްލުން ވަޒަންކުރުމުގެ ސައްހަކަން އިތުރުވެ އަވަސްވެގެންދާނެއެވެ.

މި މަސައްކަތަކީ އެން.ޑީ.އެމް.އޭގެ ސްޓްރެޓީޖިކް އެކްޝަން ޕްލޭނާ އެއްގޮތްވާ ގޮތުގެމަތިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާންކުރައްވާފައިވާ ޑިޖިޓަލް މޯލްޑިވްސް 2.0ގެ ގައުމީ ޑިޖިޓަލައިޒޭޝަން ލަނޑުދަނޑިތަކާ އެއްގޮތް، އަދި 'ސެންޑާއީ ފްރޭމްވޯކް ފޯ ޑިޒާސްޓަރ ރިސްކް ރިޑަކްޝަން' އާއި 'އާލީ ވޯނިންގްސް ފޯ އޯލް' އިސްނެގުމުގެ ދަށުން ވެފައިވާ ބައިނަލްއަގުވާމީ އިލްތިޒާމުތަކަށް ބާރުދޭ މުހިއްމު މަސައްކަތެކެވެ.

ޑާލާ ޕޯޓަލް ފަރުމާކުރުމުގެ މަސައްކަތް ކޮށްފައިވަނީ ޔޫ.އެން.ޑީ.ޕީގެ ފަންޑިން ވިންޑޯ މެދުވެރިކޮށް ޑެންމާކާއި ލަގްޒެމްބާގް އަދި ދެކުނު ކޮރެއާ ސަރުކާރުގެ ދީލަތި އެހީއާއެކުގައެވެ.