ނާދީތަކަކީ އިސްރަށްވެހިންނަށް އުފާވެރިކަން ގެނެސްދޭ މަރުކަޒުތަކެއް: ޒުހުރުބާން

އިސްރަށްވެހިންގެ ނާދީތަކަކީ އިސްރަށްވެހިންގެ ޖިސްމާނީ، ނަފްސާނީ އަދި އިޖުތިމާޢީ ދުޅަހެޔޮކަން ކަށަވަރުކުރުމަށް ތަފާތު ބާވަތްތަކުގެ ހަރަކާތްތައް ހިންގުމުގެ މަގުސަދުގައި ޤާއިމުކުރެވިފައިވާ މަރުކަޒުތަކެއް ކަމުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރ ޢާޢިޝަތު ޒުހުރުބާން ވިދާޅުވެއްޖެއެވެ.

ސްޓޭޓް މިނިސްޓަރ މިފަދައިން ވިދާޅުވީ ރާއްޖެމިއަދު ޕްރޮގްރާމުގައި އިސްރަށްވެހިންގެ ނާދީގައި ހިންގޭ ޙާއްސަ ހަރަކާތްތަކާއި ގުޅޭގޮތުން ވާހަކަ ދައްކަވަމުންނެވެ.

އެގޮތުން، މާލެ އިސްރަށްވެހިންގެ ނާދީއަކީ އިސްރަށްވެހިންނަކީ ޝަރަފުވެރިކަމާއި ގަދަރުވެރިކަމާއެކު މުޖުތަމަޢުގައި ހަރަކާތްތެރިވެ އުޅޭ ޝާމިލުވެ އުޅޭ ބައެއްކަން ކަށަވަރުކުރުމަށް އިސްރަށްވެހިންނަށް އަމާޒުކޮށްގެން އިންތިޒާމުކޮށްގެން ހަރަކާތްތައް ހިންގުމަށް ރާއްޖޭގެ އެކި ސަރަހައްދުތަކުގައި މަރުކަޒުތަކެއް ޤައިމުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެލެއްވި ވައުދުފުޅާއި އެއްގޮތްވާ ގޮތުގެ މަތިން ޤާއިމުކުރި ފުރަތަމަ މަރުކަޒުކަމުގައި ޒުހުރުބާން ފާހަގަކުރެއްވިއެވެ.

އެގޮތުން ނާދީގައި ހިންގޭ ހަރަކާތްތަކުގެ ތެރޭގައި ސިއްޙީ ދުޅަހެޔޮކަން ކަށަވަރުކުރުމަށް އިސްރަށްވެހިންނަށް އަމާޒުކޮށްގެން ލުއި ކަސްރަތު ޕްރޮގްރާމް ފަދަ ހަރަކާތްތައް ކުރިއަށްގެންދިއުމާއި، އިސްރަށްވެހިންނަށް ސިއްހަތާއި ބެހޭ މުހިންމު މަޢުލޫމާތު ފޯރުކޮށްދިނުމާއި އިސްރަށްވެހިންގެ ސިއްހީ ދުޅަހެޔޮކަން ހަށަވަރުކުރުމަށް ސިއްހީ މާހިރުންނާއި ގުޅިގެން ހާއްސަ މަޢުލޫމާތު ސެޝަނތައް ކުއިއަށްގެންދެވޭ ކަމުގައި ވެސް ޒުހުރުބާން ވަނީ ވިދާޅުވެފައެވެ.

ހަމައެހެންމެ، އިސްރަށްވެހިންގެ ނާދީތަކަކީ އިސްރަށްވެހިންގެ އިޖުތިމާޢީ ދުޅަހެޔޮކަން ކަށަވަރުކުރުމަށް ވެސް ތަފާތު ހަރަކާތްތައް ރާވަ މަރުކަޒުތަކެއްކަން ފާހަގަކުރައްވަމުން، ޒުހުރުބާން ވިދާޅުވީ، ނާދީއަށް ޒިޔާރަތްކުރައްވާ އިސްރަށްވެހިންނަށް އެބޭފުޅުންގެ ދިރިއުޅުމުގެ ތަޖުތިބާތައް ހިއްސާކުރުމާއި އުފާވެރި ވަގުތުކޮޅެއް ހޭދަކުރުމުގެ ފުރުސަތުތައް ނާދީން ފަހިވެގެންދާ ކަމުގައެވެ.

"މީގެކުރިން އިސްރަށްވެހިންނަށް ހާއްސަ ހަރަކާތްތައް ހިންގާނެ ވަކި ސަރަހައްދެއް ކަނޑައެޅިގެންނެއް ނުދޭ. އެހެންނަމަވެސް، މިހާރު އެބޭފުޅުންނަށް އެބޭފުޅުންގެ ހާއްސަ ތަނެއް، ހާއްސަ ސަރަހައްދެއް އެބޭފުޅުންގެ ހިތުގައި ހުރި އުދާސްތައް ބޭރުކޮށްލެވޭނެ ފަދަ މާހައުލެއް ޤާއިމުކުރެވިގެން ގޮސްފައިމިވަނީ. އޭގެއިތުރަށް މިފާހަގަކޮށްލެވެނީ، އެބޭފުޅުންގެ ޢިޖުތިމާޢީ ދުޅަހެޔޮޮކަން ހޭލުންތެރިކުރުމާއި ރައްކާތެރިކަން ކަށަވަރުކުރުމަށް ހިންގޭ ތަފާތު އެކި ހަރަކާތްތައް މި ނާދީގެ ތެރޭގައި ކުރިއަށް ގެންދެވޭކަން." ޒުހުރުބާން ވިދާޅުވިއެވެ.

އަދި ނާދީތަކަކީ ވަރަށް އުފާވެރި މާހައުލެއް ކަމަށާއި ނާދީތަކަށް ގޮސް އެކަކު އަނެކަކާއެކު ވަގުތުތައް ހޭދަކޮށްލާ ނާދީން ކުރިއަށް ގެންދާ އެކިއެކި ހަރަކާތްތަކުގައި ބައިވެރިވުމުގެ ސަބަބުން އެ އެކަނިވެރިކަމުން އިސްރަށްވެހީން ދުރުވެ ދުޅަހެޔޮ ސިއްހަތެއްގައި ހުންނަން ވަރަށް ބޮޑު އެހީތެރިކަމެއް ފޯރުކޮށްދެވޭ ކަމަށް ވެސް ޒުހުރުބާން ވަނީ ވިދާޅުވެފައެވެ.

އިސްރަށްވެހިންގެ ރައްކާތެރިކަމާއި ދުޅަހެޔޮކަމަށް އަމާޒުކޮށްގެން ތަފާތު ގިނަ ހަރަކާތްތައް ކޮންމެ ހަފުތާއަކުވެސް އިސްރަށްވެހިންގެ ނާދީގައި އަންނަނީ ކުރިއަށް ގެންދަމުންނެވެ. އަދި ނާދީގައި ކުރިއަށް ގެންދާ މިފަދަ ހަރަކާތްތަކުގައި ދޮށީ ޢުމުރުގެ ކޮންމެ ބޭފުޅަކަށްވެސް ބައިވެރިވުމުގެ ފުރުސަތު ވަނީ ހުޅުވާލާފައެވެ.