ހުޅުމާލެގެ ބައެއް މަގުތައް ތަރައްޤީކުރުމަށް ޗައިނާގެ ރޯޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑާއި ހަވާލުކޮށްފި

ހުޅުމާލެގެ ބައެއް މަގުތައް ތަރައްޤީކުރުމަށް ޗައިނާގެ ކުންފުންޏަކާއި ހަވާލުކޮށްފި އެވެ.

މިމަހުގެ 3 ވަނަ ދުވަހު އެޗްޑީސީގައި ބޭއްވި ރަސްމިއްޔާތެއްގައި މި މަޝްރޫއު އެކުންފުނީން ހަވާލުކުރީ ޗައިނާގެ ރޯޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑާއެވެ. މި މަޝްރޫއުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ އަލީ ޒުހައިރުއެވެ. ޗައިނާ ކުންފުނީގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރ ޒޫ ވީޑޮންގ އެވެ.

އެޗްޑީސީން މައުލޫމާތު ދޭގޮތުގައި އެކުންފުންޏާއި ހަވާލުކޮށްފައިވަނީ ފޭސް 1ގައި މިހާރު ނުނިމި ހުރި 5 މަގެއް ތަރައްޤީކުރުމުގެ މަސައްކަތާއި، ފޭސް 2 ގެ ވިނަރެސް ފްލެޓްތައް ކައިރިން އޮތް މަގު ތަރައްޤީކުރުމަށެވެ. އެގޮތުން މި މަޝްރޫއުގެ ދަށުން ޖުމްލަ 1.1 ކިލޯމީޓަރުގެ މަގުގެ ސަރަޙައްދުގައި ތާރު އަޅައިގެން ތަރައްޤީކުރާނެ ކަމަށް އެޗްޑީސީން ބުނެއެވެ.

މީގެ އިތުރުން އެޗްޑީސީން ވަނީ ހުޅުމާލޭގައި މީގެކުރިން ހަދާފައިވާ މަގުތަކުގެތެރެއިން، ހަލާކުވެފައިވާ މަގުތައް މަރާމާތުކުރުމުގެ މަސައްކަތްވެސް އެކުންފުންޏާއި ހަވާލުކޮށްފައެވެ. އެގޮތުން ހުޅުމާލޭގެ ފިތުރޯނު މަގާއި އެހެން ބައެއް މަގުތައް މަރާމާތުކުރުމަށް ވަނީ ހަމަޖެހިފައި އެވެ.

ފޭސް 1 އަދި 2 ގެ މަގުތައް ހެދުމުގެ މި މަޝްރޫޢުގެ މަސައްކަތް ޗައިނާގެ ރޯޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑާއި ހަވާލުކުރީ 6 މަސް ދުވަހުގެތެރޭގައި ނިންމާގޮތަށެވެ.