ލަންކާއަށް އެހީވުމަށް ޚާއްސަ ޓެލެތޯނެއް ފަށައިފި

" ސިލޯނާއެކު ދިވެހީން"ގެ ނަމުގަ ޚާއްސަ ޓެލެތޯން ފަށައިފިއެވެ.

މިއީ ލަންކާއަށް އެރި ބާރުގަދަ ތޫފާނާއިއެކު އެގައުމަށް ބޮޑެތި ގެއްލުންތަކެއްވެ ބައިނަލަގްވާމީ އެހީއަށް އެދިފައިވާ ދަނޑިވަޅެއްގައި ރާއްޖެއިންވެސް ލަންކާއަށް އެހީވުމަށް ކުރިއަށްގެންދާ ޓެލެތޯނެކެވެ.37 މީޑިއާއެކު ކުރިއަށް ގެންދާ މި ޓެލެތޯން މިހާރު ފަށާފައިވާއިރު މިރޭ މެންދަމު 1:00ޖެހުމާ ހަމައަށް މި ޓެލެތޯން ކުރިއަށް ދާނެއެވެ. މިޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށާއި ޖަމްޢިއްޔާ، ޖަމާޢަތް، ކްލަބްތަކާއި އޮފީސްތަކަށް ވެސް ވަނީ ހުޅުވާލާފައެވެ.މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބެހެއްޓުމުގެ އިތުރުން ފަންޑަށް އެހީވުމަށް ފަސޭހަ ގިނަ އިންތިޒާމްތަކެއްވަނީ ހަމަޖައްސާފައެވެ. އެގޮތުން ކިއުއާރު ކޯޑް ސްކޭންކޮށްގެން ފަސޭހައިން ފައިސާ ޖަމާ ކުރެވޭނެ އިންތިޒާމްވަނީ ހަމަޖައްސާފައެވެ. އަދި ނަގުދު ފައިސާ، ޓްރާންސްފަރގެ އިތުރުން ޗެކް މެދުވެރިކޮށްވެސް މިޓެލެތޯނަށް ފައިސާ ޖަމާކުރެވޭ ގޮތް ވަނީ ހަމަޖައްސާފައެވެ.

ޓެލެތޯން ކުރިއަށްދާ ވަގުތު ސްކޭމަރުން އޮޅުވާލައިގެން ފައިސާ ހޯދުމުގެ ކަންކަން ކުރިއަށްގެންގޮސްދާނެތީ ހުރިހައި ފަރާތްތަކުންވެސް އެކަމަށް ސަމާލުވުމަށް ފުލުހުން ވަނީ އިލްތިމާސްކޮށްފައެވެ.މިޓެލެތޯންގެ އޮޑިޓް ފަރމެއްގެ ގޮތުގައި މަސައްކަތް ކުރާނީ ކްރޯ މޯލްޑިވްސް އެވެ.

މި ޓެލެތޯން ކުރިޔަށްގެންދިޔުމަށް ނިންމައި އެކަން ރަސްމީކޮށް އިއުލާނުކުރީ ދައުލަތުގެ މީޑިއާ، ޕަބްލިކް ސަރވިސް މީޑިއާ (ޕީއެސްއެމް)އިންނެވެ.