ރާއްޖެއާއި ކޮރެއާ ދެމެދު ފަތުރުވެރިކަމުގެ ދާއިރާއިން އިތުރަށް ގުޅުން ބަދަހިކުރުމަށް މަޝްވަރާކޮށްފި

ދިވެހިރާއްޖޭގެ ފަތުރުވެރިކަމާ ތިމާވެއްޓާ ބެހޭ މިނިސްޓަރ، އޮނަރަބަލް ޠާރީޤު އިބްރާހިމް، ކޮރެއާ ރިޕަބްލިކްގެ ކަލްޗަރ، ސްޕޯޓްސް އެންޑް ޓޫރިޒަމްގެ ނައިބު މިނިސްޓަރ، ހިޒް އެކްސަލަންސީ ދޭހިޔުން ކިމްއާ ބައްދަލުކުރައްވައިފިއެވެ.

މި ބައްދަލުކުރެއްވުން ކުރިޔަށް ގެންގޮސްފައިވަނީ މިހާރު ސަޢޫދީ ޢަރަބިއްޔާގައި ކުރިޔަށްދާ އ.ދ ގެ ޓޫރިޒަމް ޖެނެރަލް އެސެމްބްލީގެ 26 ވަނަ ބައްދަލުވުމުގެ ހަވާސާގައި އެވެ.

މި ބައްދަލުވުމުގައި ދެގައުމު ދެމެދު ފަތުރުވެރިކަމުގެ ސިނާއަތް ކުރިއެރުވުމަށް ގުޅިގެން މަސައްކަތް ކުރުމާ ބެހޭގޮތުން ފުޅާ ދާއިރާއެއްގައި މަޝްވަރާކޮށްފައިވެއެވެ. މައިގަނޑު ގޮތެއްގައި މި މަޝްވަރާތަކުގައި ބާރުއަޅާފައިވަނީ ދިވެހިރާއްޖޭގެ ފަތުރުވެރިކަން ކޮރެއާ މާކެޓުގައި އިތުރަށް ކުރިއެރުވުމާއި، މާކެޓިންގެ ދާއިރާއިން ދެގައުމު ގުޅުން ބަދަހިކުރުމަށެވެ.

މީގެ އިތުރުން ދެގައުމު ގުޅުވައިދޭ ކަނެކްޓިވިޓީ (ދަތުރުފަތުރުގެ ގުޅުން) ވަރުގަދަކުރުމަށްވެސް ވަނީ ޚިޔާލު ބަދަލުކުރައްވާފައެވެ.

މިފަދަ ބައްދަލުވުންތަކުގެ ސަބަބުން ދިވެހިރާއްޖޭގެ ފަތުރުވެރިކަމުގެ ސިނާއަތަށް ބައިނަލްއަޤްވާމީ ފެންވަރުގައި އިތުރު ކުރިއެރުންތަކެއް ލިބި، ދިވެހި އިޤްތިޞާދަށް ފައިދާ ކުރާނެ ކަމަށް ބެލެވޭކަމަށް ފަތުރުވެރިކަމާއި ބެހޭ ވުޒާރާއިން ބުނެއެވެ.