އޭޝިއަން މާސްޓަރސް: 10 ކިލޯ މީޓަރު ދުވުމުން ދެވަނަ ހުސީއަށް

އިންޑިއާގެ ޗެންނާއީގައި މިހާރު ކުރިއަށްދާ 23 ވަނަ އޭޝިއަން މާސްޓަރސް އެތްލެޓިކްސް މުބާރާތުގެ 45 އަހަރުން މަތީގެ އަންހެނުންގެ 10 ކިލޯ މީޓަރު ދުވުމުން ދެވަނަ ރާއްޖޭގެ ހުސްނާ މުހައްމަދު (ހުސީ) ހޯދައިފިއެވެ.

މިމުބާރާތަކީ 35 އަހަރުން މަތީގެ އެތްލީޓުންނަށް ޚާއްސްކޮށްގެން އޭޝިޔާ ސަރަހައްދުގައި ބާއްވާ އެންމެ ބޮޑު އެތްލެޓިކްސް މުބާރާތެވެ. އަދި މިއަހަރުގެ މުބާރާތުގައި ޖުމްލަ 22 ގައުމަކުން 3312 އެތްލީޓަކު ވަނީ ބައިވެރިވެފައެވެ.

45 އަހަރުން މަތީގެ އަންހެން 10 ކިލޯ މީޓަރު ދުވުމުގައި ޖުމްލަ 14 އެތްލީޓަކު ވާދަކުރިއިރު، މިއިވެންޓުން އެއްވަނަ ހޯދީ ޕަލްވިން ކޯރް (އިންޑިއާ) އެވެ. ދެވަނަ ހޯދީ ހުސްނާ މުހައްމަދު (ދިވެހިރާއްޖެ) އެވެ. އަދި ތިންވަނަ ހޯދީ އަންޖަލީ ޗޮރާސިއާ (އިންޑިއާ).

މީގެ އިތުރުން މިމުބާރާތުގެ 5000 މީޓަރު ދުވުމުން ތިންވަނަ ހުސީ ހޯދިއިރު، 45 އަހަރުން މަތީގެ އަންހެން 800 މީޓަރު ދުވުމުގައި، ޖުމްލަ 27 ދުންވުންތެރިންނާއި ވާދަކޮށް ހުސީ ރޭސް ނިންމާފައިވަނީ ފަސްވަނައިގައެވެ. އަދި މިއުމުރުފުރާގެ 1500 މީޓަރު ދުވުމުން ހުސީއަށް ލިބުނީ ހަތަރުވަނަ އެވެ.