އޭޝިއަން މާސްޓާރސް: ހީޓުގެ އެއްވަނަ ހޯދައި، އާމިރު 200 މީޓަރު ފައިނަލުން ޖާގަ ހޯދައިފި

އިންޑިއާގެ ޗެންނާއީގައި މިހާރު ކުރިއަށްދާ 23 ވަނަ އޭޝިއަން މާސްޓަރސް އެތްލެޓިކްސް މުބާރާތުގެ 55 އަހަރުން މަތީގެ ފިރިހެން 200 މީޓަރު ދުވުމުގެ ހީޓު ހައެއްގެ އެއްވަނަ ހޯދައި ރާއްޖޭގެ ކުރީގެ އެއްވަނަ ދުވުންތެރިއާ މުހައްމަދު އާމިރު ފައިނަލުން ޖާގަ ހޯދައިފިއެވެ.

55 އަހަރުން މަތީގެ ފިރިހެން 200 މީޓަރު ދުވުމުގައި ޖުމްލަ 56 އެތްލީޓުން ވާދަކުރިއިރު، އާމިރު ވާދަކޮށްފައިވަނީ ހީޓް ހައެއްގައެވެ. އަދި މި ހީޓުގައި އަށް އެތްލީޓުން ވާދަކުރިއިރު، މި ހީޓް އާމިރު ކާމިޔާބުކޮށްފައިވަނީ ފަސޭހަކަމާއެކު އެވެ.

5 ނޮވެމްބަަރު 2025 އިން 9 ނޮވެމްބަރު 2025ގެ ނިޔަލަށް ޗެންނާއީގައި މިހާރު ކުރިއަށްދާ މިމުބާރާތަކީ 35 އަހަރުން މަތީގެ އެތްލީޓުންނަށް ޚާއްސްކޮށްގެން އޭޝިޔާ ސަރަހައްދުގައި ބާއްވާ އެންމެ ބޮޑު އެތްލެޓިކްސް މުބާރާތެވެ. އަދި މިއަހަރުގެ މުބާރާތުގައި ޖުމްލަ 22 ގައުމަކުން 3312 އެތްލީޓަކު ވަނީ ބައިވެރިވެފައެވެ.

55 އަހަރުން ދަށުގެ ފިރިހެން 200 މީޓަރު ފައިނަލް ފެށުމަށް ހަމަޖެހިފައިވަނީ މިއަދު މެނދުރު ފަހު، ރާއްޖެ ގަޑިން 15؛15 އެވެ. މިއިވެންޓްގެ ފައިނަލުގައި އާމިރު ވާދަކުރަން ޖެހޭނީ އިންޑިއާ، ސްރީ ލަންކާ، ތައިލޭންޑްގެ އިތުރުން ސިންގަޕޫރުގެ ދުވުންތެރިންނާއެވެ.