ރޭސިން ޓްރެކް އެޅުމަށް 2.4 މިލިއަން ރުފިޔާ އަންނަ އަހަރުގެ ބަޖެޓުގައި ‪ހިމަނައިފި

ރާއްޖޭގައި ރޭސިން ޓްރެކްގެ މައްސަލައަށް އަވަސް ހައްލެއް ހޯއްދަވަައިދެއްވުމަށް އަންނަ އަހަރަށް ލަފާކުރާ ބަޖެޓުގެ ޕަބްލިކް ސެކްޓާ އިނެވެސްޓްމަންޓް ޕްރޮގްރާމް (ޕީއެސްއައިޕީ)ގެ ދަށުން ރޭސިން ޓްރެކްތައް އެޅުމަށް 2.4 މިލިއަން ރުފިޔާ ސަރުކާރުން ހިމަނައިފިއެވެެ.

އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅީ 64.2 ބިލިއަން ރުފިޔާގެ ބަޖެޓެކެވެ. މި ބަޖެޓުގައި ޕީއެސްއައިޕީގެ ދަށުން ހިންގުމަށް ހަމަޖެހިފައިވާ ކުޅިވަރުގެ މަޝްރޫޢުތަކަށް 403 މިލިއަން ރުފިޔާ ވަނީ ހިމަނާފައެވެ.

އެގޮތުން ރޭސިންގ ޓްރެކް އެޅުމަށް އަންނަ އަހަރުގެ ބަޖެޓުގައިވަނީ 2,375,000 (ދެ މިލިއަން ތިން ލައްކަ ހަތްދިހަ ފަސް ހާސް) ރުފިޔާ ހިމަނާފައެވެ.

މިކަމާ ގުޅިގެން މިނިސްޓާ އޮފް ޔޫތު އެމްޕަވަމަންޓް އިންފޮމޭޝަން އެންޑް އާޓްސްގެ އެޑްވައިޒަރު އަހުމަދު ނަރީޝް ވަނީ ރޭސިން ދާއިރާގައި ހަރާކާތްތެރިވާ އެތައް ޒުވާނުން އެތައް ޒަމާނެއް ވަންދެން އެތައް ސަރުކާރެއްގައި ދަންނަވައިގެން ހައްލު ނުލިބި އޮތް މައްސަލައަށް ހައްލު ހޯދުމުގެ މަސައްކަތް ސަރުކާރުން ފެއްޓެވީތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ޝުކުރު އަދާކުރައްވާފައެވެ.

ރޭސިންގ ޓްރެކެއް އެޅުމުގެ މަސައްކަތް ސަރުކާރުން ހަވާލުކޮށްފައިވަނީ އެމްއޭސީއެލްއާ އެވެ. އެ ޓްރެކް ހެދުމަށް ހަމަޖެހިފައިވަނީ ހުޅުލެ-ހުޅުމާލެ ލިންކް ރޯޑުގެ ބޭރުން މޫދުން ބައެއް ހިއްކައިގެންނެވެ. މި މަޝްރޫއުގެ ޓެކްނިކަލް މަސައްކަތްތައް އެމްއޭސީއެލް އިން ވަނީ ފަށާފައެވެ.