ހުޅުމާލެ ފޭސް-3 ހިއްކާ ސަރަހައްދުގައި އަޅާފައިވާ އުޅަނދުތައް ނަގަން އަންގައިފި

ހުޅުމާލެ ފޭސް-3 ގެ ހިއްކާ ސަރަހައްދުގައި ބިން ހިއްކުމުގެ މަސައްކަތަށް ދަތިވާގޮތަށް އަޅާފައިވާ އުޅަނދުތައް ނެގުމަށް ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ)ން އަންގައިފިއެވެ.

އެގޮތުން 3 ވަނަ ފިޔަވަހީގެ ހިއްކަން ހަމަޖެހިފައިވާ ސަރަހައްދުގެ ޗާޓަކާއި އެއްކޮށް މިއަދު އެޗްޑީސީން ކުރި އިއުލާނެއްގައި ބުނީ ބިން ހިއްކުމުގެ މަސައްކަތަށް ދަތިވާ ގޮތަށް އަޅާފައިވާ އުޅަނދުތައް އަންނަ ނޮވެމްބަރު މަހަުގެ 6 ވަނަ ދުވަހުގެ 0:00 ގެ ކުރިން ނެގުމަށް އަންގާ ކަމަށެވެ. އަދި މިގޮތަށް ނެގޭ އުޅަނދުތައް ހިއްކާ ސަރަހައްދުން ބޭރުގައި އެޅޭނެ އިންތިޒާމު ހަމަޖައްސާފައިވާ ކަމަށް އެކުންފުނިން ވަނީ ބުނެފައެވެ.

މި މަޝްރޫއުގެ ދަށުން ހުޅުމާލެ ފޭސް 3 ގައި 63 ހެކްޓަރުގެ ބިން އިތުރުކުރުމަށް ވަނީ ހަމަޖެހިފަ އެވެ. މި މަސައްކަތް ފަށާފައިވަނީ މިދިޔަ އަހަރުގެ ސެޕްޓެމްބަރު މަހު 22 ގަ އެވެ.

މި މަޝްރޫއަކީ މާލެ ސަރަހައްދުގައި ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ކުރިއަށް ގެންދެވޭ މަޝްރޫއެކެވެ.