ނައިފަރުގެ މިހާރުގެ ބަނދަރު އަޕްގްރޭޑްކުރުމާއިއެކު އިތުރު ބަނދަރެއް ތަރައްޤީކުރަން އެމްޓީސީއާއި ހަވާލުކޮށްފި

ޅ ނައިފަރުގެ ބަނދަރު މަޝްރޫއު އެމްޓީސީއާއި ހަވާލުކޮށްފި އެވެ.

ސަރުކާރުން މި މަޝްރޫއުގެ މަސައްކަތް އެމްޓީސީސީއާއި ހަވާލުކުރީ ރައީސުލްޖުމްހުރިއްޔާ ޑރ މުހައްމަދު މުއިއްޒު މިހާރު ޅ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ނައިފަރަށް ވަޑައިގެން ރޭ އެރަށުގެ ރައްުޔިތުންނާއި ބައްދަލުކުރެއްވުމަށް ބޭއްވި ޖަލްސާގައި އެވެ.

މި މަޝްރޫއުގެ އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން ހައުސިންގ އެންޑް އިންފްރާސްޓަރަކްޗަރގެ ފަރާތުން ސޮއިކުރެއްވީ މިނިސްޓަރު ޑރ. އަބްދުالله މުއްޠަލިބް އެވެ. އަދި އެމްޓީސީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރ، ޑެޕިއުޓީ ކޮމިޝަނާ އޮފް ޕޮލިސް (ރިޓަޔަރޑް) އަޙުމަދު ސައުދީއެވެ.

އެމްޓީސީސީއާއި ހަވާލުކޮށްފައިވަނީ ނައިފަރުގައި މިހާރު ބޭނުންކުރާ ބަނދަރު އަޕްގްރޭޑްކުރުމާއިއެކު އިތުރު ބަނދަރެއް ތަރައްޤީކުރުމުގެ މަސައްކަތެވެ.

މި މަޝްރޫއުއާއި ގުޅޭގޮތުން ރައީސް ޑރ މުއިއްޒު ރޭ ވިދާޅުވީ ނައިފަރަކީ ދެމެހެއްޓެނިވި ތަރައްޤީގެ މުހިންމު ބައިވެރިއެއްކަމަށާއި ސަރުކާރުން އެރަށުގައި ކުރިޔަށްގެންދާ މަޝްރޫޢުތައް ނުހުއްޓި، ބާރު ދުވެލީގައި ކުރިއަށްގެންގޮސްދެއްވާ، ނިންމަވައިދެއްވާނެކަމުގެ ޔަޤީންކަން ދެއްވާ ކަމަށެވެ.

އެގޮތުން ރަށުގެ ތަރައްޤީއަށް ކުރައްވާ ބައެއް މަސައްކަތްތަކަށް އަލިއަޅުވާލައްވަމުން އައު ބަނދަރާއި މިހާރު އޮތް ބަނދަރުގެ ކެޕޭސިޓީ އިތުރުކުރުމާއެކު، އަނެއްކާވެސް، މީހުން ދިރިއުޅޭ ރަށްރަށުގެ ތެރެއިން އެންމެ ބޮޑު ބަނދަރެއް އޮތް އެއް ރަށަށް ޅ.ނައިފަރު ވާނޭ ކަމަށާއި، ހަމަ ޔަޤީނުންވެސް އުތުރުގައި އޮންނަ އެންމެ ބޮޑު ބަނދަރަށް ވާނެކަމުގައި ރައީސް ވިދާޅުވިއެވެ.