ހިންނަވަރު ފެނަކަ އޮފީސް އިމާރާތް ރަސްމީކޮށް ހުޅުވައިފި

ހިންނަވަރުގައި ތަރައްޤީކުރި ފެނަކަ ކޯޕަރޭޝަން އޮފީހުގެ އައު އިމާރާތް ރަސްމީކޮށް ހުޅުވައިފި އެވެ.

މި އިމާރާތް ރަސްމީކޮށް ހުޅުވާފައިވަނީ ރައީސުލްޖުމްހުރިއްޔާ ޑރ މުހައްމަދު މުއިއްޒު މިހާރު ޅ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހިންނަވަރަށް ވަޑައިގެން ބޭއްވި ރަސްމިއްޔާތެއްގައި އެވެ.

އެ ރަސްމިއްޔާތުގައި މި އިމާރާތް ރަސްމީކޮށް ހުޅުއްވައިދެއްވީ ރައީސުލްޖުމްހުރިއްޔާ ޑރ މުހައްމަދު މުއިއްޒު އެވެ. އަރިހުގައި ފެނަކަ ކޯޕަރޭޝަންގެ މެނޭޖިންގ ޑިރެކްޓަރާއި އެދާއިރާގެ މަޖިލިސް މެމްބަރުގެ އިތުރުން ކައުންސިލްގެ ރައީސް ބައިވެރިވެވަޑައިގެންނެވި އެވެ.

ފެނަކައިން މައުލޫމާތު ދޭގޮތުގައި އަލަށް ހުޅުވިގެންދިޔަ ފެނަކަ އައު އޮފީސް ޢިމާރާތަކީ، މުވައްޒަފުންނަށް ދަތިނުވެ މަސައްކަތް ކުރެވޭނެ ޖާގަ ތަނަވަސް ޒަމާނީ އޮފީސް ޢިމާރާތެކެވެ. އެގޮތުން ފެނާއި ކަރަންޓާއި ނަރުދަމާގެ ހިދުމަތުގެ އިދާރީ އެންމެހާ މަސައްކަތެއް މި އޮފީހުން ކުރެވޭނެކަން އެކުންފުނީން ހާމަކުރެއެވެ.

ދެ ފަންގިފިލާގެ މި އޮފީސް އިމާރާތަކީ އިންޓަލޮކް ޕްރައިވެޓް ލިމިޓެޑާއި ހަވާލުކޮށްގެން 22 ސެޕްޓެމްބަރު 2023 ގައި ފެށި މަޝްރޫއެކެވެ. މި މަޝްރޫއުގެ އަމަލީ މަސައްކަތް ނިމުނީ މިއަހަރުގެ އޮގަސްޓު މަހުގެ 28 ވަނަ ދުވަހު އެވެ.