މިލަންދޫ ވޮލީކޯޓާއި ފުޓްސަލް ދަނޑު ހުޅުވައިފި

ށ މިލަންދޫ ވޮލީކޯޓާއި ފުޓްސަލް ދަނޑު ހުޅުވައިފި އެވެ.

މިލަންދޫގައި ކުރިޔަށްގެންދިޔަ ކުޅިވަރުގެ މި ދެ މަޝްރޫއު ނިމި ރަސްމީކޮށް އެ ދަނޑުތައް ހުޅުވާފައިވަނީ ރައީސުލްޖުމްހުރިއްޔާ ޑރ މުހައްމަދު މުއިއްޒު މިހާރު ށ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މިއަދު މިލަންދޫއަށް ވަޑައިގެންނެވުމުންނެވެ. އެގޮތުން އަލަށް ތަރައްޤކުރި ވޮލީކޯޓާއި ފުޓްސަލް ދަނޑު ރަސްމީކޮށް ހުޅުއްވައި ދެއްވީ ރައީސް ޑރ މުހައްމަދު މުއިއްޒު އެވެ.

މިއަދު އަލަށް ހުޅުވި ވޮލީ ކޯޓު ތަރައްޤީކޮށްފައިވަނީ ފެންސު ޖަހާ ދުވާލާއި ރޭގަނޑަށްވެސް ބޭނުންކުރެވޭގޮތަށް ލައިޓް ހަރުކޮށް އެންމެ ޒަމާނީ ފެންވަރަށެވެ.

މީގެ އިތުރުން މިލަންދޫ ފުޓްސަލް ދަނޑު ސަރުކާރުން ތަރައްޤީކޮށްފައިވަނީ ރޮސްޓްރަމާއި ޗޭންޖިންގ ރޫމަކާއި އޮފީހެއްގެ އިތުރުން ލައިވް ރޫމަކާ ރެފްރީންނަށް ޚާއްސަ ރޫމެއް ހިމެނޭ ގޮތަށެވެ.

މި ދެ މަޝްރޫއަކީވެސް ކުރީ ސަރުކާރުން އަމަލީ މަސައްކަތް ފަށައި ސަރުކާރު ބަދަލުވިި އިރު ހުއްޓިފައި އޮތް ދެ މަޝްރޫއެވެ.