ޗައިނާގެ މާވެއި ޝިޕްބިލްޑިންގ ކުންފުންޏަށް މިނިސްޓަރު ޝިޔާމް ޒިޔާރަތްކުރައްވައިފި

ޗައިނާގެ ފުޖިއަން މާވެއި ޝިޕްބިލްޑިންގ ކުންފުންޏަށް މިނިސްޓަރ އަޙްމަދު ޝިޔާމް ޒިޔާރަތްކުރައްވައިފިއެވެ.

މިނިސްޓްރީން ބުނީ މި ޒިޔާރަތުގެ ބޭނުމަކީ، ދިވެހިރާއްޖޭގެ މަސްވެރިކަމުގެ ޞިނާޢަތަށް އާ ކުރިއެރުންތަކެއް ހޯދައިދިނުމަށް ޗައިނާގެ ބޯޓު ބަނުމުގެ ޞިނާޢަތުގެ ތަޖުރިބާ ހޯއްދުން ކަމަށެވެ.

މި ޒިޔާރަތުގައި، މިނިސްޓަރު ޝިޔާމް ވަނީ މާވެއި ޝިޕްބިލްޑިންގ ކުންފުނީގެ ވަސީލަތްތައް ބައްލަވާލައްވައި، ޗައިނާގެ ބޯޓު ބަނުމުގެ ޞިނާޢަތުގެ ފުންކޮށް އޮޅުންފިލުއްވާފައެވެ. އޭގެ އިތުރުން، އެމަނިކުފާނު ވަނީ އެ ކުންފުނީގެ މާހިރުންނާ ބައްދަލުކުރައްވައި، ދިވެހިރާއްޖެއަށް އެކަށޭނެ ޒަމާނީ އުކުޅުތަކާއި ޓެކްނޮލޮޖީތަކާ ބެހޭގޮތުން މަޝްވަރާކުރައްވާފައެވެ.

ޚާއްޞަކޮށް މި މަޝްވަރާތަކުގައި ބޮޑު ސަމާލުކަމެއް ދެވުނީ، ދިވެހި މަސްދޯނިފަހަރުގެ ޑިޒައިނާއި ހަރުދަނާކަން އިތުރުކުރުމަށާއި، ގުޅުންހުރި އެހެނިހެން ޞިނާޢަތްތަކުގައި އައު ގޮތްތައް ތަޢާރަފުކުރުމަށް އެހީތެރިވެދޭނެ ކަންކަމަށެވެ.

މިނިސްޓަރ ޝިޔާމްގެ މި ޒިޔާރަތަކީ ދިވެހިރާއްޖޭގެ މަސްވެރިކަމުގެ ޞިނާޢަތަށް ޒަމާނީ ކުރިއެރުންތަކެއް ގެނެސް، ދިވެހި މަސްވެރިންގެ ދިރިއުޅުމަށް އިތުރު ފަސޭހަތަކެއް ހޯދައިދިނުމަށް ކުރެވޭ މަސައްކަތްތަކުގެ މުހިންމު ބައެއް ކަމަށް މިނިސްޓްރީން ދެކެއެވެ.