ގްރީން ކްލައިމެޓް ފަންޑުގެ 25 މިލިއަން ޑޮލަރުގެ މަޝްރޫޢު ޔޫ.އެން.އީ.ޕީ އާއިއެކު ފަށަނީ

ދިވެހިރާއްޖެއާއި އދ. ގެ ތިމާވެށީގެ ޕްރޮގްރާމް (ޔޫ.އެން.އީ.ޕީ) އާ ގުޅިގެން ކުރިއަށްގެންދާނެ އާ މަޝްރޫޢެއް ރަސްމީކޮށް ފަށައިފި އެވެ.

މިކަން އިއުލާނުކުރީ އޭޕެކް އެންވަޔަރަންމަންޓް ފޯރަމް (APENVFORUM) ގެ ހަވާސާގައި، ފަތުރުވެރިކަމާ ތިމާވެއްޓާބެހޭ ވުޒާރާގެ ވަޒީރު ޠާރިޤު އިބްރާހީމް ދެއްކެވި ވާހަކަފުޅުގައި އެވެ.

މިއީ ގްރީން ކްލައިމެޓް ފަންޑު (ޖީ.ސީ.އެފް) އިން މުޅިން އަލަށް ފާސްކޮށްފައިވަނީ 25 މިލިއަން އެމެރިކާ ޑޮލަރުގެ ހިލޭ އެހީގެ މަޝްރޫޢެކެވެ. މި މަޝްރޫޢުގެ ނަމަކީ 'ޓުވާޑް ރިސްކް-އެވެއަރ އެންޑް ކްލައިމެޓް-ރެޒިލިއަންޓް ކޮމިއުނިޓީސް (ޓްރެކްޓް)' އެވެ. މި މަޝްރޫޢު ރަސްމީކޮށް ފެށުމާއެކު، ދިވެހިރާއްޖޭގެ މުޖުތަމަޢުތައް ތިމާވެށީގެ ގޮންޖެހުންތަކާ ކުރިމަތިލާން ތައްޔާރުކުރުމަށް ބޮޑު ބާރެއް ލިބިގެންދާނެ ކަމަށް މިނިސްޓްރީން ބުނެއެވެ.

ވަޒީރު ޠާރިޤު މިކަން ހާމަކުރެއްވީ، ދުނިޔޭގެ ތިމާވެށި ރައްކާތެރިކުރުމާއި ގުޅޭގޮތުން މުހިންމު މަޝްވަރާތައް ކުރެވޭ އޭޕެކް އެންވަޔަރަންމަންޓް ފޯރަމްގެ ބައްދަލުވުންތަކުގެ ތެރެއިންނެވެ. މި މަޝްރޫޢުގެ މައިގަނޑު މަޤްސަދަކީ، ދިވެހިރާއްޖޭގެ ރަށްރަށުގެ މުޖުތަމަޢުތަކަކީ ތިމާވެށީގެ ނުރައްކާތަކަށް ހޭލުންތެރި، އަދި މޫސުމީ ބަދަލުތަކާ ކުރިމަތިލާން ތައްޔާރުވެފައިވާ ބަޔަކަށް ހެދުމެވެ.

ގުޅިގެން ކުރިއަށްގެންދާ މި މަސައްކަތުގެ ސަބަބުން ދިވެހިރާއްޖެއަށް ކުރިމަތިވަމުންދާ މޫސުމީ ބަދަލުތަކުގެ ގޮންޖެހުންތަކުން އަރައިގަތުމަށް ބޮޑު އެހީތެރިކަމެއް ލިބިގެންދާނެއެވެ. ޚާއްސަކޮށް، ރަށްރަށުގެ ރައްޔިތުންނަށް ތިމާވެށީގެ ނުރައްކާތަކާބެހޭ މައުލޫމާތު ދީ، އެކަންކަމުން ރައްކާތެރިވުމަށް ބޭނުންވާ ގާބިލިއްޔަތުކަން އިތުރުކުރުމަށް މި މަޝްރޫޢުން އެހީތެރިވެދޭނެއެވެ.

މިފަދަ ބައިނަލްއަޤްވާމީ މަޝްރޫޢުތަކާއި އެހީތެރިކަމުގެ ސަބަބުން، ދިވެހިރާއްޖޭގެ ދެމިތިބޭ ތަރައްޤީއަށް މަގުފަހިވެ، ތިމާވެށި ރައްކާތެރިކުރުމުގެ މަސައްކަތްތަކަށް އިތުރު ބާރެއް ލިބިގެންދާނެއެވެ.