މީޑިއާ "ކޮންޓްރޯލް" ކުރާ ބިލާއި ގުޅޭގޮތުން މަޝްވަރާކުރުމަށް ކޮމެޓީން ނޫސްވެރިންނަށް ދައުވަތުދީފި

ރައްޔިތުންގެ މަޖިލީހަށް ހުށަހަޅާފައިވާ މީޑިއާތައް ރެގިއުލޭޓްކުރުމުގެ ބިލާއި މެދު މަޝްވަރާކުރަން ނޫސްވެރިންނަށް ދައުވަތު ދީފި އެވެ.

ރައްޔިތުންގެ މަޖިލީހުން މިއަދު ނެރުނު އިއުލާނެއްގައި ބުނީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ދިރާސާކުރައްވަމުން ގެންދަވާ "މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު" އާ ގުޅޭގޮތުން ދިވެހިރާއްޖޭގައި ރަޖިސްޓަރކޮށްފައިވާ މީޑިއާތަކާއެކު މަޝްވަރާކުރެއްވުމަށް ކޮމެޓީން ނިންމާފައިވާ ކަމަށެވެ.

އަދި މި ބައްދަލުވުން ބޭއްވުމަށް ތާވަލުކޮށްފައިވަނީ 1 ސެޕްޓެންބަރު 2025 ވާ ހޯމަ ދުވަހުގެ 11:00 ގައި ރައްޔިތުންގެ މަޖިލީހުގެ އިދާރާގައި އެވެ.

އެ މަޝްވަރާ ބައްދަލުވުމުގައި ދިވެހިރާއްޖޭގައި ރަޖިސްޓަރކޮށްފައިވާ މީޑިއާތަކުން ބައިވެރިވެވަޑައިގެން ދެއްވުމަށް ކޮމެޓީން ވަނީ ދައުވަތުދީފައި އެވެ.

އެ މަޝްވަރާ ބައްދަލުވުމުގައި ބައިވެރިވެ ވަޑައިގެންނެވޭނީ ކޮންމެ މީޑިއާއަކުން ގިނަވެގެން 1 ބޭފުޅަކަށްކަމަށްވެސް މަޖިލީހުން މިއަދު ނެރުނު އިއުލާނުގައި ބުނެފައި އެވެ.

ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ހުށަހެޅުއްވި އެ ބިލު އިއްޔެވަނީ ދައުރުން ބޭރުން މަޖިލިސް ޖަލްސާއެއް ބާއްވައި ބަލައިގަނެފައެވެ. އެ ބިލު މިހާރު އޮތީ ކޮމެޓީ މަރުހަލާގައެވެ.

މިދިޔަ ހަފުތާގެ ތެރޭގައި މަޖިލީހަށް އެ ބިލު ހުށަހެޅީއްސުރެ ނޫސްވެރިން އަންނަނީ ކަންބޮޑުވުން ފާޅުކޮށް ބިލު އަނބުރާ ގެންދިއުމަށް ގޮވާލަމުންނެވެ.