ޗައިނާގެ ފުޖިއަން ޕްރޮވިންސްއިން ރާއްޖެއަށް ކުޅިވަރު ސާމާނު ހަދިޔާކޮށްފި

ޕީޕަލްސް ރިޕަބްލިކް އޮފް ޗައިނާގެ ފުޖިއަން ޕްރޮވިންސްގެ ފަރާތުން ގިނަ އަދަދެއްގެ ކުޅިވަރު ސާމާނު ދިވެހިރާއްޖެއަށް ހަދިޔާކުރައްވައިފިއެވެ.

ހެންވޭރު ބޯޅަ ގޭގައި އޮތް ހާއްސަ ރަސްމިއްޔާތުގައި މި ކުޅިވަރު ސާމާނާ ސަރުކާރުގެ ފަރާތުން ހަވާލުވެލެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. ޗައިނާގެ ފަރާތުން ސާމާނު ހަވާލުކޮށްދެއްވީ ޗައިނާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ކޮން ޝިންހުއާއެވެ.

މިއަދު ހަދިޔާކުރެއްވި ކުޅިވަރު ސާމާނުގެ ތެރޭގައި ހިމެނެނީ ފުޓްބޯޅަ، ސްޕޯޓްސް ބެކްޕެކް، އަދި ޖާޒީ ފަދަ ތަކެތި ހިމެނެއެވެ.

މިއީ މި އަހަރު ފުޖިއަން ޕްރޮވިންސުން ރާއްޖެއަށް ކުޅިވަރު ސާމާނު ހަދިޔާކުރި ދެވަނަ ފަހަރެވެ. މީގެ ކުރިން މިދިޔަ ޖޫން މަހުގެ ތެރޭގައިވެސް ގިނަ ކުޅިވަރު ސާމާނު ފުޖިއާން ޕްރޮވިންސުން ހަދިޔާކުރިއެވެ. އޭގެ ތެރޭގައި ފުޓްބޯޅަ، ޓޭބަލް ޓެނިސް ރެކެޓާއި ބޯޅަ އަދި އެތުލެޓިކްސްގައި ބޭނުންކުރާ ބައެއް ސާމާނު ހިމެނެއެވެ.

ޗައިނާ އަކީ ކުޅިވަރުގެ ދާއިރާއިން ދިވެހިރާއްޖެއަށް ގިނަ އެހީތަކެއްވަމުން އަންނަ ގައުމެކެވެ. މިގޮތުން ކުޅިވަރު ސާމާނު ހަދިޔާކުރުމާއި، ދިވެހި އެތުލީޓުންނާއި ޓީމްތަކަށް ތަމްރީން ހެދުމުގެ ގިނަ ފުރުސަތުތަކެއް މީގެ ކުރިން ޗައިނާއިން ވަނީ ފަހިކޮށްދެއްވާފައެވެ.