ތަފާތުބޮޑު ނަތީޖާއަކުން އެފްސީ ބްރަދާސް ބަލިކޮށް ގުރޫޕްގެ އެއްވަނަ ޑްރީމް އެފްސީ އިން ކަށަވަރުކޮށްފި

މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ ފިރިހެން ޑިވިޝަން ގުރޫޕް ދޭއްގައި ރޭ އެފްސީ ބްރަދާސް އާއި ޑްރީމް އެފްސީ ވާދަކުރި މެޗު 12-0 ގެ ތަފާތުބޮޑު ނަތީޖާއަކުން ކާމިޔާބުކޮށް ގުރޫޕްގެ އެއްވަނަ ޓީމުގެ ގޮތުގައި ޑްރީމް އެފްސީ އިން މުބާރާތުގެ ސެމީފައިނަލުގެ ޖާގައެއް ކަށަވަރުކޮށްފިއެވެ.

މުބާރާތުގެ ގުރޫޕް ސްޓޭޖުގައި ޑްރީމް އެފްސީ ކުޅުނު ފުރަތަމަ މެޗުގައި އެޓޭކް އެޓޭކް އެޓޭކް އަތުން 5-1 ގެ ނަތީޖާއަކުން މޮޅުވިއިރު، ދެވަނަ މެޗުގައި އެފްސީ ބްރަދާސް އަތުން މޮޅުވީ 5-2 ގެ ނަތީޖާއަކުންނެވެ. އަދި ތިންވަނަ މެޗުގައި އެޓީމުން ވަނީ 6-1 ގެ ނަތީޖާއަކުން އެޓޭކް އެޓޭކް އެޓޭކް ބަލިކޮށްފައެވެ. އަދި އެފްސީ ބްރަދާސްގެ ފުރަތަމަ މެޗުގައި ޑްރީމް އެފްސީ އަތުން 5-2 ގެ ނަތީޖާއަކުން ބަލިވެފައިވާއިރު، ދެވަނަ މެޗުގައި އެޓޭކް އެޓޭކް އެޓޭކް އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

މުޅި މެޗުގައި ވެސް ޑްރީމް އެފްސީގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ޑްރީމް އެފްސީ ކުރީގައި އޮވެގެންނެވެ. އަދި ދެވަނަ ހާފުގައި ޑްރީމް އެފްސީ އިން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު އަށް ލަނޑު ކާމިޔާބުކޮށްފައެވެ.

އެގޮތުން މިމެޗުގައި ޑްރީމް އެފްސީގެ އަރީފް މަހުމޫދު ހަތަރު ލަނޑު ކާމިޔާބުކުރިއިރު، އެޓީމުގެ އަބްދުﷲ ޝާފިއު ވަނީ ތިންލަނޑު ކާމިޔާބުކޮށް ހެޓްރިކް ހަފާފައެވެ. އަދި މީގެ އިތުރުން އެޓީމުގެ އާމިލް އަލީ ދެލަނޑު ކާމިޔާބުކުރިއިރު، އަލީ ފަހުމީ، އަލީ ފަޒީން އަދި މުހައްމަދު އިޔާން އިބްރާހިމް ޒުހޫރު މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޑްރީމް އެފްސީގެ އަރީފް މަހުމޫދު އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތުގައި ޑްރީމް އެފްސީ އިން ސެމީފައިނަލްގެ ޖާގައެއް ކަށަވަރުކުރިއިރު، މިމެޗުން ބަލިވި އެފްސީ ބްރަދާސް ގުރޫޕް ސްޓޭޖުގައި ކުޅުނު ތިން މެޗުން ލިބުނު އެއްޕޮއިންޓާއެކު ލަނޑުގެ ތަފާތުން މިވަގުތު އޮތީ ގުރޫޕްގެ ފުލުގައެވެ.

8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ދަނީ ބައިވެރިވި ހަ ޓީމު ދެގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.