ވާދަވެރި ކުޅުމަކަށްފަހު ރުއްދަށް އެސްސީ ބަލިކޮށް ގުޅުން ކަންމަތިން ގުރޫޕްގެ އެއްވަނަ ކަށަވަރުކޮށްފި

މިހާރު ކުރިއަށްދާ "ކުޑަހުވަދޫ ކައުންސިލް ފުޓްސަލް މުބާރާތް 2025" ގެ ފިރިހެން ޑިވިޝަން ގުރޫޕް ދޭއްގައި ރޭ ކުޅުނު މެޗުގައި ވާދަވެރި ކުޅުމަކަށްފަހު ރުއްދަށް ސްޕޯޓްސް ކުލަބު (އާރުއެސްސީ) 1-0 ގެ ނަތީޖާއަކުން ބަލިކޮށް ގުޅުނު ކަންމަތިން ގުރޫޕްގެ އެއްވަަނަ ކަށަވަރުކޮށްފިއެވެ.

މުބާރާތުގައި ގުޅުން ކަންމަތިން ކުޅުނު ފުރަތަމަ މެޗުގައި 15-1 ގެ ތަފާތު ބޮޑު ނަތީޖާއަކުން އައްކަން އެސްސީ އަތުން މޮޅުވިއިރު، ދެވަނަ މެޗުގައި އާރުއެސްސީ އަތުން އެޓީމު މޮޅުވީ 3-1 ގެ ނަތީޖާއަކުންނެވެ. އަދި އެޓީމުގެ ތިންވަނަ މެޗުގައި އައްކަން އަތުން މޮޅުވީ 12-2 ގެ ތަފާތުބޮޑު ނަތީޖާއަކުންނެވެ.

މުބާރާތުގައި އާރުއެސްސީ ކުޅުނު ފުރަތަމަ މެޗުގައި 6-1 ގެ ނަތީޖައަކުން އައްކަން އަތުން މޮޅުވި ނަމަވެސް ދެވަނަ މެޗުގައި ގުޅުނު ކަންމަތި އަތުން 3-1 ގެ ނަތީޖާއަކުން އެޓީމު ވަނީ ބަލިވެފައެވެ. އަދި އެޓީމުގެ ތިންވަނަ މެޗުގައި އައްކަން އަތުން މޮޅުވީ ވާދަވެރި ކުޅުމަކަށްފަހު 2-0 ގެ ނަތީޖާއަކުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 31 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު އާޖިލް މުހައްމަދު ފައްޔާޒު އެވެ.

މީގެ އިތުރުން ވެސް މިމެޗުގައި ދެޓީމުން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ގުޅުން ކަންމަތި ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ގުޅުން ކަންމަތީގެ އަބްދުލް މުގުސިތު އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ގުރޫޕްގެ އެއްވަނައިގައި ގުޅުން ކަންމަތި އޮތްއިރު، މިމެޗުން ބަލިވި އާރުއެސްސީ ސްޓޭޖުގައި ކުޅުނު ހަތަރު މެޗުން ހޯދި ހަ ޕޮއިންޓާއެކު އޮތީ ގުރޫޕްގެ ދެވަނައިގައެވެ. އަދި މިމެޗުގެ ކުރިން ވެސް މިދެޓީމަށް ވަނީ މުބާރާތުގެ ސެމީފައިނަލް ޔަގީންވެފައެވެ.

8 އޮގަސްޓް 2025 އިން 17 އޮގަސްޓް 2025 ގެ ނިޔަލަށް، ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތުގެ މެޗުތައް ކުރިއަށް ދަނީ ބައިވެރިވި ހަ ޓީމު ދެގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

ޗެންޕިއަން ޓީމަށް 20،000 އަދި ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވާއިރު މުބާރާތުގެ އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.