މެލޭޝިޔާ ހައިކޮމިޝަނުގައި ' މޯލްޑިވްސް ކޯނަރ" އެއް ހުޅުވައިފި

ދިވެހިރާއްޖެއަށް މިނިވަންކަން ލިބުނުތާ 60 އަހަރުފުރުމާ ގުޅިގެން މެލޭޝިޔާގެ ވެރިރަށް ކުއާލަލަމްޕޫރުގައި ހުންނަ ދިވެހިރާއްޖޭގެ ހައިކޮމިޝަނުގެ ދަށުން ޤާއިމްކުރެވިފައިވާ މޯލްޑިވްސް ސެންޓަރުގެ ފަރާތުން ' މޯލްޑިވްސް ކޯނަރ' ގެ ނަމުގައި ބުކްކޯނަރއެއް އިފްތިތާހް ކޮށްފިއެވެ.

މޯލްޑިވްސް ކޯނަރ ހުޅުވާ ދެއްވީ ދިވެހިރާއްޖެއިން މެލޭޝިޔާއަށް ކަނޑައަޅުއްވާފައިހުންނަވާ ސަފިރު، ޑރ. މަރިޔަމް ޝަބީނާ އަހުމަދެވެ.

މޯލްޑިވްސް ކޯނަރ ހުޅުވުމާއެކު، ކުޑަކުދީންގެ ވާހަކަ ފޮތް ޝާއިއު ކުރާ ދިވެހިރާއްޖޭގެ އަމިއްލަ ފަރާތެއްކަމުގައިވާ 'ތަކެތި' ގެ ފަރާތުން ކުޑަކުދީންގެ ވާހަކަ ފޮތް ހަދިޔާކުރިއެވެ. މި ފޮތް ހަދިޔާކުރެއްވީ 'ތަކެތި' ގެ ވެރިފަރާތް ކަމުގައިވާ އަލްފާޟިލާ އާމިނަތު ޝަރީހާން އިބްރާހިމެވެ.

މޯލްޑިވްސް ކޯނަރ ގެ މައިގަނޑު މަޤްސަދަކީ މެލޭޝިއާގައި ގައި ދިރިއުޅޭ ދިވެހިންނާ އަދި ކިޔަވާ ދަރިވަރުންނަށް ބޭނުންވާ ދިވެހި ފޮތްތައް، ފަސޭހައިން ލިބޭނޭ މަގު ތަނަވަސްކޮށްދީ، މިކަމުގެ ސަބަބުން އެފަރާތްތައް ދިވެހި ބަހާއި އަދަބިއްޔާތައް ޝައުގުވެރިކުރުވުމެވެ. މީގެ އިތުރުން، ދިވެހި ސަގާފަތާ ބެހޭ މުހިންމު މަޢުލޫމާތު ފޯރުކޮށްދިނުމާއި، "ކަލްޗަރަލް ޑިޕލޮމެސީ"ގެ ދަށުން އަދަބީ އަދި ސަޤާފީ އެކި ހަރަކާތް ހިންގުމެވެ. ހަމައެއާއެކު، މޯލްޑިވްސް ކޯނަރ މެދުވެރިކޮށް ރާއްޖޭގެ ލައިބްރަރީތަކާއި ތަޢުލީމީ މަރުކަޒުތަކަށް މެލޭޝިއާގެ ޝާއިޢުކުރުންތައް ހިއްސާކުރުމެވެ.

މެލޭޝިޔާގައި ކިޔަވާ ދިވެހި ދަރިވަރުންނާއި އަދި މެލޭޝިޔާގައި ދިރިއުޅޭ އެކި ފަރާތްތަކުން ރާއްޖެއާބެހޭގޮތުން ހަދާފައިވާ އިލްމީ ކަރުދާސްތައް މިސެންޓަރު މެދުވެރިކޮށް، ބޭނުންވާ އެހެން ފަރާތްތަކަށް ލިބޭނޭ އިންތިޒާމް ހަމަޖެއްސުމަކީވެސް އިފްތިތާހުވެގެން މިދިޔަ މޯލްޑިވްސް ކޯނަރ ގެ މުހިންމު މަޤްސަދެކެވެ.