ކަސްޓަމްސްގެ ޤާނޫނު ތަންފީޒުކުރާ އޮފިސަރުންނަށް ސައިޓީސް ތަމްރީނު ޕްރޮގްރާމް ބާއްވައިފި

ދިވެހިރާއްޖޭގެ ކަސްޓަމްސްގެ ޤާނޫނު ތަންފީޒުކުރާ އޮފިސަރުންނަށް ޚާއްސަކޮށްގެން ސައިޓީސް އާ ބެހޭ ތަމްރީނު ވޯކްޝޮޕެއް ބާއްވައިފިއެވެ.

މި ވޯކްޝޮޕްގެ މައިގަނޑު މަޤްޞަދަކީ ކަސްޓަމްސް އޮފިސަރުންނަށް ސައިޓީސްގެ ޤަވާއިދުތައް ތަންފީޒުކުރުމަށް ބޭނުންވާ މަޢުލޫމާތާއި ހުނަރު އިތުރުކުރުމެވެ.

މާލޭގައި އިއްޔެ ބޭއްވުނު މި ތަމްރީނު ޕްރޮގްރާމުގައި، ސައިޓީސް އާ ބެހޭ ތަޢާރަފެއް ކަމަށްވާ، ސައިޓީސް އުފެދުނުގޮތާއި އޭގެ މުހިންމުކަން ވަނީ ކިޔައިދީފައެވެ. އަދި ދިވެހިރާއްޖޭގައި ސައިޓީސްއާ ގުޅިގެން ޤާނޫނީގޮތުން ޢަމަލުކުރާނެ އޮނިގަނޑާއި، ޤާނޫނުތައް ތަންފީޒުކުރުމުގައި ކަސްޓަމްސް އޮފިސަރުންގެ ދައުރު ވަރަށް ތަފްޞީލުކޮށް މި ވޯކްޝޮޕްގައި ވަނީ ބައިވެރިންނަށް އުނގަންނައިދީފައެވެ.

މި ތަމްރީނު ޕްރޮގްރާމްގެ މުހިންމުކަމަކީ، ނެތިދިއުމުގެ ބިރުހުރި ދިރޭތަކެއްޗާއި ގަސްގަހާގެހީގެ ބައިނަލްއަޤްވާމީ ވިޔަފާރި ކޮންޓްރޯލްކޮށް، ޤަވާއިދާ ޚިލާފަށް ކުރެވޭ ވިޔަފާރި ހުއްޓުވުމުގައި ކަސްޓަމްސް އޮފިސަރުންގެ ދައުރު ވަރަށް ބޮޑުވެފައި، މިފަދަ ތަމްރީނުތަކަކީ އެކަންކަމަށް އޮފިސަރުން ތައްޔާރުކުރުމަށް ވަރަށް ބޭނުންތެރި ކަމަށް ފާހަގަކުރެވޭ ކަމަށް މިނިސްޓްރީން ބުނެއެވެ.

މިފަދަ ތަމްރީނު ޕްރޮގްރާމްތައް ކުރިއަށް ގެންދިޔުމަކީ ދިވެހިރާއްޖޭގެ ސަރަޙައްދު ބެލެހެއްޓުމާއި، ބައިނަލްއަޤްވާމީ މުޢާހަދާތަކަށް ޢަމަލުކުރުމަށް ބާރުއަޅާނެ ކަމެކެވެ.