ދަތުރުފަތުރުގެ ދާއިރާއިން ބޭރުވާ ގޭސްތަކުގެ އިންވެންޓަރީ ތަރައްގީކުރުމާބެހޭ ތަމްރީން ވޯކްޝޮޕެއް ކުރިޔަށް ގެންގޮސްފި

ފަތުރުވެރިކަމާ ތިމާވެއްޓާބެހޭ ވުޒާރާ އިންތިޒާމުކޮށްގެން، ދަތުރުފަތުރުގެ ދާއިރާއިން ބޭރުވާ ގޭސްތަކުގެ އިންވެންޓަރީ ތަރައްގީކުރުމާބެހޭ ދެ ދުވަހުގެ ތަމްރީން ވޯކްޝޮޕެއް މާލޭގައި ކާމިޔާބުކަމާއެކު ނިންމާލައިފިއެވެ.

2025 ވަނަ އަހަރުގެ ޖުލައި މަހުގެ 21 އިން 22 އަށް ކުރިއަށްދިޔަ މި ވޯކްޝޮޕްގެ މައިގަނޑު މަގުސަދަކީ ދަތުރުފަތުރުގެ ދާއިރާއިން ބޭރުވާ ގްރީންހައުސް ގޭސްތަކުގެ މިންވަރު ސީދާކޮށް ދެނެގަނެ، މޮނިޓަރކޮށް، ރިޕޯޓުކުރުމުގައި ގައުމީ ފެންވަރުގެ ހިއްސާދާރުންގެ ގާބިލުކަން އިތުރުކުރުމެވެ.

މި ވޯކްޝޮޕް އިންތިޒާމުކުރެވުނީ "ދަތުރުފަތުރުގެ ދާއިރާއަށް ބޭރުވާ ގޭސްތަކުގެ އިންވެންޓަރީ ތަރައްގީކުރުން" މަޝްރޫއުގެ ދަށުންނެވެ. މި މަޝްރޫއަށް ފަންޑުކޮށްފައިވަނީ ކްލައިމެޓް އެންޑް ކްލީން އެއަރ ކޯލިޝަން (ސީ.ސީ.އޭ.ސީ.) އިން ކަމަށްވާއިރު، މި މަޝްރޫއު ތަންފީޒުކުރަނީ އދ.ގެ ތިމާވެށި ޕްރޮގްރާމް (ޔޫ.އެން. އެންވަޔަރަންމެންޓް) އިންނެވެ. މީގެ އިތުރުން، "ރާއްޖޭގައި މޫސުމަށް އަންނަ ބަދަލުތައް ކުޑަކުރުމާއި އެކަމަށް ހޭނުންތެރިވުމުގެ މަސައްކަތްތަކުގެ ދެފުށް ފެންނަ ބާވަތް އިތުރުކުރުމަށް ގާބިލުކަން ހަރުދަނާކުރުމުގެ މަޝްރޫޢު (ސީ.ބީ.އައި.ޓީ. މޯލްޑިވްސް)" ގެ އެހީތެރިކަމާއެކު މި މަސައްކަތް ކުރިއަށްގެންދެވުނެވެ. ސީ.ބީ.އައި.ޓީ. މޯލްޑިވްސް މަޝްރޫއަށް ފަންޑުކޮށްފައިވަނީ ގްލޯބަލް އެންވަޔަރަންމެންޓް ފެސިލިޓީ (ޖީ.އީ.އެފް.) އިން ކަމަށްވާއިރު، މިއީ ޔޫ.އެން. އެންވަޔަރަންމެންޓްގެ އެހީތެރިކަމާއެކު މިނިސްޓްރީން ތަންފީޒުކުރާ މަޝްރޫޢެކެވެ.

މި ތަމްރީން ވޯކްޝޮޕް ރަސްމީކޮށް ހުޅުއްވައިދެއްވީ ފަތުރުވެރިކަމާބެހޭ އަދި ތިމާވެއްޓާބެހޭ ވުޒާރާގެ ސްޓޭޓް މިނިސްޓަރު، އިބްރާހީމް މިމްރާޙްއެވެ. އެމަނިކުފާނު ވަނީ މިފަދަ ފުރިހަމަ އިންވެންޓަރީތައް ތަރައްގީކުރުމަށް މުއައްސަސާތަކުގެ ގާބިލުކަން އިތުރުކުރުމުގެ މުހިންމުކަމުގެ މައްޗަށް ބައްލަވައިލައްވާފައެވެ.

މި ވޯކްޝޮޕްގައި ސަރުކާރުގެ އަދި އަމިއްލަ ޖުމްލަ 14 މުއައްސަސާއަކުން ބައިވެރިން ބައިވެރިވިއެވެ. މި ތަމްރީން ބިނާކުރެވިފައިވަނީ ހަކަތަ އަދި ދަތުރުފަތުރުގެ މައުލޫމާތު މެނޭޖްކުރުމާއި، މޫސުމަށް އަންނަ ބަދަލުތައް ކުޑަކުރުމާއި، ރޭވުމާއި، ޖީ.އެޗް.ޖީ. އިންވެންޓަރީ ތަރައްގީކުރުމާއި، ގައުމީ ފެންވަރުގައި ކަނޑައަޅާފައިވާ މަގުސަދުތައް (އެން.ޑީ.ސީ.ތައް) ޓްރެކްކުރުމުގައި ހަރަކާތްތެރިވާ ފަންނީ ފަރާތްތަކަށެވެ.

ވޯކްޝޮޕްގެ ސެޝަންތައް ކުރިއަށްގެންދެވީ ޔޫ.އެން. އެންވަޔަރަންމެންޓްގެ އޭޝިއާ-ޕެސިފިކް ސަސްޓެއިނަބަލް މޮބިލިޓީ ލީޑް ޔެއޮންޖޫ ޖިއޮންގް އާއި، އޭޝިއަން އިންސްޓިޓިއުޓް އޮފް ޓެކްނޮލޮޖީ (އޭ.އައި.ޓީ.) ގެ ޑރ. އެކްބޯޑިން ވިންކްޖުލްއެވެ. ތަމްރީނުގައި ފަންނީ ޕްރެޒެންޓޭޝަންތަކާއި، އަމަލީ މަސައްކަތްތަކާއި، ގޭސް މިންކުރާ ވަސީލަތްތައް ދައްކާލުމާއި، އިންޓަރެކްޓިވް ގްރޫޕް މަސައްކަތް ހިމެނުނެވެ. މިކަމުގެ ސަބަބުން ބައިވެރިންގެ އިންވެންޓަރީގެ މެތަޑޮލޮޖީތަކާއި މޮނިޓަރިންގ، ރިޕޯޓިންގ، އަދި ވެރިފިކޭޝަން (އެމް.އާރް.ވީ) ފްރޭމްވޯކްތަކާބެހޭ ދޭހަ އިތުރުވިއެވެ.

ތަމްރީން ނިންމުމުގެ ރަސްމިއްޔާތުގައި، ތަމްރީން ކާމިޔާބުކަމާއެކު ފުރިހަމަކުރި ބައިވެރިންނަށް ބައިވެރިވިކަމުގެ ސެޓްފިކެޓު ދެއްވީ ސްޓޭޓް މިނިސްޓަރު އިބްރާހީމް މިމްރާޙްއެވެ. އެމަނިކުފާނުގެ ނިންމެވުމުގެ ބަސްފުޅުގައި، ކްލައިމެޓް އެންޑް ކްލީން އެއަރ ކޯލިޝަން (ސީ.ސީ.އޭ.ސީ.) އާއި، ޔޫ.އެން. އެންވަޔަރަންމެންޓް ޕްރޮގްރާމް، އަދި އޭޝިއަން އިންސްޓިޓިއުޓް އޮފް ޓެކްނޮލޮޖީއަށް، ފައިދާހުރި ސެޝަންތައް ހިންގަވައިދެއްވުމަށްޓަކައި ހިތުގެ ފުންމިނުން ޝުކުރު އަދާކުރެއްވިއެވެ. އަދި ގައުމީ ފެންވަރުގައި ދެފުށް ފެންނަގޮތަށް ކުރާ މަސައްކަތްތައް އަސަރުގަދަ ގާބިލުކަން ބިނާކުރުމުގެ ތެރެއިން ކުރިއެރުވުމަށް ސީ.ބީ.އައި.ޓީ. މޯލްޑިވްސް މަޝްރޫއުން ދެއްވި ދެމިހުރި އެހީތެރިކަމަށް ވެސް އެމަނިކުފާނު ވަނީ ތައުރީފު ކުރައްވާފައެވެ.