--
އެންމެ ޒަމާނީ ވަސީލަތްތަކާއިއެކު ހުޅުމާލޭގައި ސިނަމާއެއް ތަރައްގީކުރަން ނިންމަފައިވާ ކަމަށް ޔޫތު މިނިސްޓަރު އިބްރާހިމް ވަހީދު (އަސްވާޑް) ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ ރޭ ކުރިޔަށް ގެންދިޔަ "އަހާ" ފޯރަމްގައި ދެއްކެވި ވާހަކަފުޅުގައި އެވެ.
މިނިސްޓަރު ވިދާޅުވީ ދިވެހި ފިލްމީ ދާއިރާއަށް ކުރިމަތިވެފައިވާ އެންމެ ބޮޑު ގޮންޖެހުންތަކުގެ ތެރޭގައި ސިނަމާތަކުގެ ދަތިކަން ހިމެނޭ ކަމަށާއި ޒަމާނީ ސިނަމާތަކެއް ނެތުމުގެ ސަބަބުން، ދިވެހި ފިލްމުތައް އުފެއްދުމަށް ފަހު ދައްކަން ދަތިވެ، ފިލްމު ބަލާ ފަރާތްތަކާއި ހަމައަށް ފިލްމު ފޯރުކޮށްދިނުމުގައި ގިނަ ގޮންޖެހުންތަކެއް ހުރި ކަމަށެވެ.
މިކަމަށް ހައްލު ގެނައުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ މަޝްވަރާކޮށްގެން ހުޅުމާލޭގައި ޒަމާނީ ވަސީލަތްތަކާއެކު ސިނަމާއެއް ގާއިމުކުރުމުގެ މަސައްކަތް ފަށަން ތައްޔާރުވެފައިވާ ކަމަށާއި އަދި މި ސިނަމާ ތަރައްޤީކުރެވިގެންދާނީ ހަތަރެއް ނޫނީ ހަ ފިލުމު އެއްފަހަރާ އެޅުވޭނެ ފެންވަރަށް ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މިމަސައްކަތަށް ބޭރުގެ އިންވެސްތޓަރުންނާއި ވާހަކަދެކެވިފައިވާކަމަށާއި މި މަސައްކަތަށް އިންވެސްޓުކުރުމަށް އެފަރާތްތަކުން މިހާރު ތިބީ ތައްޔާރަށް ކަމަށެވެ.
"މީކީ ތޯތޯއަށް ރުއްސަން ދައްކާ ވާހަކައެއް ނޫން. އެމީހުންނާ ބައްދަލުވެއްޖެ،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ އެ ސިނަމާ ގާއިމުކުރުމާއެކު، ފިލްމީ ދާއިރާގައި ހަރަކާތްތެރިވާ ޒުވާނުންނަށް އިތުރު ފުރުސަތުތައް ހުޅުވި، އެމީހުންގެ އުފެއްދުންތައް އާއްމުންނާ ހަމައަށް ފޯރުކޮށްދިނުމަށް ފަސޭހަވެގެންދާނެއެވެ. މިއާއިއެކު މިކަމަށް ފިލްމު އުފައްދާ ފަރާތްތަކުން ތައްޔާރުވުމަށް މިނިސްޓަރު ވަނީ ވިދާޅުވެފައި އެވެ.
ފަހުގެ
