
ރައީސްގެ އެންގެވުމާއި އެއްގޮތަށް ފެނަކައިންވެސް މޭމަހުގެ ކަރަންޓު ބިލްތައް ކުޑަ ޓެރިފް ރޭޓަށް ބަދަލުކޮށްފި
# ފެނަކަ ކޯޕަރޭޝަން--
ފެނަކަ ކޯޕަރޭޝަނުންވެސް ކަރަންޓު ބިލްތަކުގެ ޓެރިފް ރޭޓު ކުޑަކޮށްފި އެވެ.

ފެނަކައިން މިއަދު ބުނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ނިންމެވުމާއި އެއްގޮތަށް އެކުންފުނީން ދެމުންދާ ކަރަންޓުގެ ހިދުމަތުގެ ޓެރިފް ރޭޓުތައް ކުޑަކޮށްފައިވާ ކަމަށެވެ. މި ގޮތުން ކުޑަ ޓެރިފް ރޭޓުތަކުގައި މިދިޔަ މޭމަހުގެ ބިލްތަށް މިހާރު ޖެނެރޭޓު ކުރެވޭނެ ކަމަށް ވަނީ ބުނެފައި އެވެ. އަދި މޭ މަހުގެ ބިލްތައް މިހާރު ދައްކާފައިވާ ފަރާތްތަކަށް ޖޫން މަހުގެ ބިލުން އެބައި އުނިކުރެވިގެންދާނެކަން ފެނަކަ ކޯޕަރޭޝަނުން ވަނީ ހާމަކޮަށްފައި އެވެ.
ސްޓެލްކޯ އާއި ފެނަކައިން ކަރަންޓުގެ ހިދުމަތް ދޭ ތަންތަނުގެ ޑޮމެސްޓިކް ކެޓަގަރީގެ ކަރަންޓު ޓެރިފް ރޭޓުތައް ނުވަތަ އާންމު ގޭބީސީތަކުގެ ކަރަންޓު ޓެރިފް ރޭޓުތައް އަންނަ ޖޫން މަހުގެ 1 އިން ފެށިގެން ކުޑަކުރަން ރައީސް ޑރ މުހައްމަދު މުއިއްޒު ނިންމަވައި އެކަން ރަސްމީކޮށް އިއުލާނުކުރެއްވީ މިދިޔަ ހުކުރު ދުވަހު އެވެ. އެގޮތުން ރައީސް ވިދާޅުވީ 1 ޖޫން 2025 އިން ފެށިގެން ޑޮމެސްޓިކް ކެޓެގަރީގެ ކަރަންޓު ޓެރިފް ރޭޓްތައް ކުޑަކޮށް، އެ ކަން ތަންފީޒުކުރުމުގައި ދެމެހެޢްޓެނިވި ގޮތެއްގައި މެނޭޖްކުރުމަށް ކަމާބެހޭ ފަރާތްތަކުން ކުރައްވަންޖެހޭ އެންމެހާ ކަންކަން ކުރެއްވުމަށް ދަންނަވާފައިވާނެ ކަމަށެވެ. އަދި ޓެރިފް ރޭޓްތަކަށް ގެންނަ ބަދަލުވެސް ރައީސް ވަނީ އެޕޯސްޓުގައި ހިއްސާކުރައްވާފައި އެވެ.
ކަރަންޓު ޓެރިފް ރޭޓުތަކަށް އަންނަ ބަދަލުތައް
- ބޭންޑް 0-100: 1.50 ރުފިޔާއިން 1.25 ރުފިޔާއަށް
- ބޭންޑް 101-200: 1.70 ރުފިޔާއިން 1.50 ރުފިޔާއަށް
- ބޭންޑް 201-300: 2.15 ރުފިޔާއިން 1.50 ރުފިޔާއަށް
- ބޭންޑް 301-400: 2.50 ރުފިޔާއިން 1.50 ރުފިޔާއަށް
- ބޭންޑް 401-500: 2.95 ރުފިޔާއިން 2.66 ރުފިޔާއަށް
- ބޭންޑް 501-600: 3.55 ރުފިޔާއިން 3.20 ރުފިޔާއަށް
- 600 އިން މަތީގެ ބޭންޑުތައް: 4.25 ރުފިޔާއިން 3.83 ރުފިޔާއަށް
ރައީސްގެ ވަޢުދުފުޅާ އެއްގޮތަށް ކަރަންޓް ބިލުތަކުން ރައްޔިތުންނަށް ލުއި ދެއްވުމަށް ސަރުކާރުން ވަނީ، ރިޔާސީ ދައުރުގައި މި ފާއިތުވި 2 ރަމަޟާން މަހުވެސް، ޑިސްކައުންޓު ދެއްވައި، ވަކި މިންވަރެއް މަޢާފްވެސް ކޮށްދެއްވާފައެވެ. ޢާއްމު ރައްޔިތުންގެ މާލީ ޙާލަތު ރަނގަޅު ކުރުމަށްޓަކައި ރައީސް މުޢިއްޒުގެ ސަރުކާރުން އަޅުއްވަމުން ގެންދަވާ ފިޔަވަޅުތަކުގެ ތެރެއިން، ޑޮމެސްޓިކް ރޭޓުގައި ހުންނަ ގޭބިސީތަކުގެ ކަރަންޓު ބިލާއި ފެން ބިލުތައް ނުދެއްކި ގިނަދުވަސް ވެގެން އަރާފައިވާ ޖޫރިމަނާ މަޢާފުކޮށް ދެއްވާފައިވާކަންވެސް ފާހަގަކޮށްލެވެއެވެ.
ގުޅުންހުރި

މައްސަލަ ހައްލުކޮށް ކަރަންޓު ދޭން ފަށައިފިން، މިވަގުތު ނުދެވި ހުރީ އައްޑޫގެ 6 ސަރަހައްދަކަށް އެކަނި - ފެނަކަ

10 މަޝްރޫއުއެއްގެ އަމަލީ މަސައްކަތް ފެނަކައިން ފަށައިފި

ފެނަކަ ކޯޕަރޭޝަންގެ އައު ޗެއާމަނަކަށް ޝާމް!
