ހުޅުމާލޭގައި މިރޭ ހަވާ އަރުވަނީ

ހުޅުމާލޭގައި މިރޭ ހަވާ އަރުވާނެ ކަމަށް އެމްއެންޑީއެފުން ބުނެފި އެވެ.

އެމްއެންޑީއެފް އިން ބުނީ ހުޅުމާލެ ފޭސް 1ގެ ރިވެލި ބީޗުގައި މިރޭ 20:00ގައި ހަވާ އެރުވުމަށް ނިންމާފައިވާ ކަމަށެވެ. އެގޮތުން ހަވާ އެރުވުމަށް ނިންމާފައިވަނީ 3 މިނެޓަށެވެ.

މިރޭ ހަވާއެރުވުމަށް ހަމަޖެހިފައިވަނީ ސިފްކޯއިން ވިޔަފާރި އުސޫލުން ޕްރައިވެޓް އިވެންޓަކަށް ސިފައިންގެ ކޯޕަރޭޓިވް (ސިފްކޯ) އިން ކަމަށްވެސް އެމްއެންޑީއެފުން ބުނެއެވެ.

ރާއްޖޭގައި ހަވާ އެރުވުމުގެ ކަންކަން ކުރިއަށް ގެންދަނީ ވިޔަފާރީގެ އުސޫލުން ސިފައިންގެ ވެލްފެއަރ ކުންފުނި ސިފްކޯ އިންނެވެ.