ޗައިނާއާއެކު އިޤްތިޞާދީ އަދި ވިޔަފާރީގެ ގުޅުން އިތުރަށް ހަރުދަނާކުރުމަށް އައު ސަފީރާއިއެކު މަޝްވަރާކޮށްފި

އެކޮނޮމިކް މިނިސްޓަރ މުޙައްމަދު ސަޢީދު ޗައިނާގެ އައު ސަފީރު ކޮންގ ޝިއަންހުއާ އާއި ބައްދަލުކުރައްވައިފިއެވެ.

މި ބައްދަލުކުރެއްވުމުގައި، ދިވެހިރާއްޖެއާއި ޗައިނާއާ ދެމެދު އޮންނަ ދުރު ޒަމާންވީ އިޤްތިޞާދީ އަދި ވިޔަފާރީގެ ގުޅުން އިތުރަށް ހަރުދަނާކުރުމާ ގުޅޭގޮތުން ޗައިނާގެ ސަފީރާއެކު މިނިސްޓަރ ސައީދު މަޝްވަރާކުރެއްވިއެވެ.

ސައީދު އާއި ސަފީރު ކޮންގ ވަނީ ރާއްޖެއާއި ޗައިނާއާދެމެދު އޮންނަ ސްޓްރެޓެޖިކް އެއްބާރުލުމުގެ ދަށުން ދެޤައުމުގެ ތަރައްޤީ ޙިއްޞާކުރާ ތަޞައްވުރުގެ މައްޗަށް މަސައްކަތްކުރުމާމެދު ޝައުޤުވެރިކަން ފާޅުކުރައްވާފައެވެ.

ސަފީރު ކޮންގ 'އެކްސް' ގައި ކުރެއްވި ޕޯސްޓެއްގައި ވިދާޅުވަނީ, މިނިސްޓަރ ސަޢީދުއާއި ބައްދަލުކުރެއްވުމަކީ ލިބުނު "ޝަރަފެއް" ކަމަށެވެ. އަދި ދިވެހިރާއްޖެއާއި ޗައިނާގެ އިޤްތިޞާދީ އަދި ވިޔަފާރީގެ އެއްބާރުލުމުގެ "ކާމިޔާބު ނަތީޖާތައް" ކުރިމަގުގައި ފެނިވަޑައިގަތުމާމެދު އުފާފުޅުވާ ކަމަށް ވެސް ވިދާޅުވެފަވެއެވެ.

އެމަނިކުފާނު ވަނީ މިނިސްޓަރ އަދި އިޤްތިޞާދީ ތަރައްޤީއާބެހޭ ވުޒާރާގެ ޓީމާ ގުޅިގެން މަސައްކަތްކުރުމާމެދު ޝައުޤުވެރިކަން ފާޅުކުރައްވާފައެވެ.

މިނިސްޓަރ ސަޢީދު ވެސް ވަނީ މި ޝުޢޫރުތަކަށް އެއްބަސްވެވަޑައިގެން، ދެ ގައުމު ދޭތެރޭގައި ހިއްސާކުރާ ތަސައްވުރާ އެއްގޮތްވާ ގޮތުގެމަތިން މުހިއްމު ނަތީޖާތަކާއި، އިޤްތިޞާދީ އުއްމީދާއި، ތަރައްޤީގެ މަންފާތައް ގެނެސްދެވޭނެކަމާމެދު ޔަޤީންކަން ފާޅުކުރައްވާފައެވެ.