ޓެކްސީލައިންގެ ޚިދުމަތް ފެށުމުން މިހާރު ދެމުން ގެންދާ ޓެކްސީ ޚިދުމަތަށް އެއްވެސް ހުރަހެއް ނެތް: އަމީން

ސަރުކާރުން ތަޢާރަފުކުރަން ނިންމާފައިވާ ޓެކްސީލައިންގެ ޚިދުމަތް ފެށުމުން މިހާރު ދެމުންގެންދާ ޓެކްސީ ޚިދުމަތަށް އެއްވެސް ހުރަހެއް ނޯންނާނެ ކަމަށް މިނިސްޓަރ މުހައްމަދު އަމީން މިއަދު ރައްޔިތުންގެ މަޖިލީހުގެ ތަޅުމުގައި ވިދާޅުވެއްޖެއެވެ.

މިނިސްޓަރ އަމީން މިހެން ވިދާޅުވީ ޓެކްސީލައިނާއި ގުޅޭގޮތުން ސުވާލުކުރުމަށް މިއަދު މަޖިލީހުގެ ތަޅުމުގައި އިއްޒަތްތެރި މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

އެގޮތުން އަމީން ވިދާޅުވީ ޓެކްސީލައިން ތަޢާރަފުކުރުމުގެ ސަބަބުން ޕްރައިވެޓް ސެކްޓަރ އިން ދެމުންގެންދާ ޓެކްސީގެ ޚިދުމަތަށް އެއްވެސް ނޭދެވޭ އަސަރެއް ނުކުރާނެ ކަމަށެވެ.

"މިހާރު ޓެކްސީ ކުރާ ފަރާތްތަކަށް ވެސް އެއްވެސް ހުރަހެއް ނެތި މިހާރެކޭ އެއްގޮތަށް ޓެކްސީ ކުރުމުގެ ޚިދުމަތް ކުރިއަށް ގެންދެވޭނެ" މިނިސްޓަރ އަމީން ވިދާޅުވިއެވެ. އަދި އިތުރަށް ވިދާޅުވީ ރަސްމީ ވަޒީފާ އަދާކުރުމަށްފަހު އިތުރު އާމްދަނީއެއް ހޯދުމުގެ ގޮތުން އެ ފަރާތްތަކަށް މި ފްލީޓްގައި މަސައްކަތްކުރުމުގެ ފުރުސަތު ލިބިގެންދާނެ ކަމަށެވެ.

އިތުރު ސުވާލުގެ ވަގުތުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވީ މާލެ ސަރަޙައްދުގައި ދިރިއުޅުއްވާ ފަރާތްތަކުން، ބޭނުންވާ ގަޑިތަކުގައި ޓެކްސީ ލިބުމުގައި މިހާރު ކުރިމަތިވަމުންދާ ދަތިތަކަށް ސަރުކާރުން މި ފައްޓާ އީވީ ޓެކްސީ ލައިންގެ ސަބަބުން ނިމުން އަންނާނެ ކަމަށެވެ.