އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހަޅާ މައްސަލަތައް ބަލައިގަންކަމުގެ އެސް.އެމް.އެސް ފޯނަށް!

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހަޅާ މައްސަލަތައް ބަލައިގަންކަމުގެ އެސް.އެމް.އެސް ފޯނަށް ފޮނުވަން ފަށައިފި އެވެ.

އެވުޒާރާއިން މިއަދު ބުނީ އެވުޒާރާއިން ފޯރުކޮށްދޭ ޚިދުމަތްތަކުގެ ފެންވަރު ރަނގަޅުކުރުމުގެ މަޤުސަދުގައި، ޚިދުމަތް ހޯދާފައިވާ ފަރާތްތަކުގެ ތެރެއިން ގިނަ ފަރާތްތަކެއްގެ ޚިޔާލު ހޯދައި، ލިބުނު ޚިދުމަތުގެ ފެންވަރާއި، އިތުރަށް ރަނގަޅުކުރެވިދާނެ ކަންތައްތަކާ ގުޅޭ މަޢުލޫމާތު އެއްކުރެވިފައިވާ ކަމަށެވެ.

އެގޮތުން، އަމިއްލަ ފަރާތްތަކުން ހުށަހަޅާ މައްސަލަތައް ހުށަހެޅިކަން އެފަރާތަށް އެނގޭނެ ގޮތެއް ނެތުމާއި އެ ކަމާގުޅޭ ގޮތުން އަދާހަމަ މަޢުލޫމާތު ލިބުމުގައި ލަސްތަކެއްވާކަމަކީ އެ ވުޒާރާއަށް ލިބޭ އެންމެ ބޮޑު އެއްޝަކުވާކަން ވަނީ ފާހަގަކުރެވިފައި ކަމަށެވެ.

އެހެންކަމުން، އާންމުންގެ ޚިޔާލުތަކުގެ މައްޗަށް ބިނާކޮށް އެ ވުޒާރާއިން ފޯރުކޮށްދޭ ޚިދުމަތުގެ ފެންވަރު ރަނގަޅުކުރުމުގެ ގޮތުން އަމިއްލަ ފަރާތްތަކުން ވުޒާރާއަށް ހުށަހަޅާ މައްސަލަތަކުގެ އަދާހަމަ، ހުށަހަޅާ ލިޔެކިޔުމުގައި ބަޔާންކޮށްފައިވާ ފޯނުނަންބަރަށް އެސް.އެމް.އެސްގެ ޒަރީޢާއިން އިން ލިބޭނެ ނިޒާމެއް މިހާރު ވަނީ ތަޢާރަފުކުރެވިފައި ކަމަށެވެ.

އަދި އެވުޒާރާއިން އަބަދުވެސް މަސައްކަތް ކުރަމުން ގެންދާނީ ރައްޔިތުންނާއި ގާތުން، ލުއިފަސޭހަ ވާނެހެން، އޯގާތެރިކަމާއި، ހިތްހެޔޮކަމާއެކު ޚިދުމަތް ފޯރުކޮށްދިނުމަށް ކަމަށްވެސް ވަނީ ފާހަގަކޮށްފައި އެވެ.