ކިޔަވައިދޭ ކޮންޓެންޓްގެ ފެންވަރު ރަނގަޅުކުރުމަށް މިއަހަރު ޚާއްޞަ އިސްކަމެއް ދޭނެ - ޝަފީއު

މި ފެށުނު ދިރާސީ އަހަރުގެ ތެރޭގައި އެންމެ ޚާއްޞަ އިސްކަމެއް ދީގެން ކުރިއަށްދާނެ މަސައްކަތަކީ ދަރިވަރުންނަށް އުނގަންނައިދެވޭ ކޮންޓެންޓްގެ ފެންވަރު ރަގަޅު ކުރުން ކަމަށް މިނިސްޓަރ ޑރ. އިސްމާޢީލް ޝަފީޢު ވިދާޅުވެޖެއެވެ.

2025 ވަނަ ދިރާސީ އަހަރު ފެށުމުގެ މުނާސަބަތުގައި ދެއްވި ޚިތާބުގައި މިނިސްޓަރ ވިދާޅުވީ ކިޔަވައިދޭ ކޮންޓެންޓްގެ ފެންވަރު އިތުރަށް ރަނގަޅުކުރުމަށްޓަކައި ވަކި ވަކި މާއްދާތަކުގެ މުޤައްރަރުތައް އަލުން މުރާޖަޢާކޮށް، ކޮންމެހެން ގެންނަންޖެހޭނެ ބަދަލުތަށް ގެނެއުމުގެ މަސައްކަތްތައް ކުރިއަށްދާނެކަމަށެވެ.

މީގެ އިތުރުން ދާއިރާގެ ޢިލްމާއި ތަޖުރިބާ ލިބިފައިވާ މުދައްރިސުންނާއި ފަންނީ ތަޖުރިބާކާރުންގެ އެހީތެރިކަމާއެކު، ކީ-ސްޓޭޖް 4 ގެ މާއްދާތަކުގެ ޓެކްސްޓް ފޮތްތަކާއި މަސައްކަތު ފޮތްތަކާއި، ޑިޖިޓަލް ކޮންޓެންޓު އެކުލަވާލުމުގެ ޢަމަލީ މަސައްކަތްވެސް މިއަހަރުގެ ތެރޭގައި ފެށިގެން ކުރިއަށް ދާނެ ކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ ތަޢުލީމީ ސިޔާސަތުތައް އޭގެ އެންމެ ފުރިހަމައަށް ތަންފީޒުކުރުމަށްހުރި ގޮންޖެހުންތައް ފިލުވާލުމަށްޓަކައި "އެޑިއުކޭޝަނަލް ގަވަރނެންސް" އިތުރަށް ހަރުދަނާ ކުރުމުގެ މަސައްކަތް މި ދިރާސީ އަހަރު ކުރިއަށްދާނެ ކަމަށެވެ. އެގޮތުން ތަޢުލީމީ ވުޒާރާއާއި ވުޒާރާގެ ދަށުން ހިންގާ ޑިވިޜަންތަކާއި ޑިޕާޓްމެންޓުތަކާއި ސެކްޝަންތަކުގެ އޮނިގަނޑުތައް މުރާޖަޢާކޮށް ގެންނަންޖެހޭ ބަދަލުތައް ގެންނަމުންދާކަމަށް މިނިސްޓަރ ވިދާޅުވިއެވެ.