⁠ޢިލާޖް ޙިޖާމާ: ރާއްޖޭގައި ހިޖާމާެ ހިދުމަތްދެމުން އަންނަ އެންމެ އެޑަްވާންސް ކްލިނިކް!

މިއަހަރުގެ ޖެނުއަރީ މަހުން ފެށިގެން މާލޭގައި ހިދުމަތް ދެމުން އަންނަ ޢިލާޖް ޙިޖާމާ އަކީ ދިވެހި ރާއްޖޭގައި ޙިޖާމާ ޖެހުމަށް އޮޕަރޭޓިންގ ލައިސެންސް ދެވި، ޚިދުމަތް ފޯރުކޮށްދިނުމަށް މިނިސްޓްރީ އޮފް ހެލްތުން ހުއްދަ ލިބުނު އެންމެ ފުރަތަމަ ކްލިނެކެވެ.

5 ޖެނުއަރީ 2025 ⁠ހެލްތު މިނިސްޓްރީގައި ރަޖިސްޓްރީ ކުރެވި، އޮޕަރޭޓިންގ ލައިސެންސް ލިބުނު މި ކްލިނިކް ރަސްމީކޮށް ހުޅުވީ ހުއްދަ ލިބުނުތާ 3 ދުވަސްފަހުން ޖެނުއަރީ މަހުގެ 8 ވަނަ ދުވަހު އެވެ.

މި ކްލިނިކަކީ ދިވެހި ރާއްޖޭގައި މިފަހުގެ ތާރީޚެއްގައި ޙިޖާމާ ޖެހުމަށް ޚާއްސަކޮށްގެން އެންމެ ފުރަތަމަ ފަރުވާ ދޭން ފެށި މީހުންގެ ތެރެއިން ހިމެނޭ މުޙައްމަދު މަޒީދުގެ ކްލިނިކެކެވެ. މިގޮތުން މަޒީދުއަކީ ރުޤްޔާ ކުރުމާއި، ނަބަވީ ބޭސްވެރިކަމުގެ ދާއިރާގައި ތަފާތު ދިރާސާތައް ކުރަމުން އަންނަ ފަރާތެކެވެ. އަދި ތަފާތު ޤައުމުތަކުން ބާއްވާފައިވާ ޙިޖާމާ ކޯސްތަކުގައި ބައިވެރިވެފައިވާއިރު މަޝްހޫރު މެލޭޝިއާގެ ޙިޖާމާ ޓްރެއިންރ އެއް ކަމަށްވާ މުޙައްމަދު ސައިފުﷲ އަކީ ވެސް އޭނާގެ އުސްތާޛެކެވެ. އަދި އޭނާ އަކީ ޙިޖާމާގެ ރޮނގުން 13 އަހަރަށް ވުރެ ގިނަ ދުވަހުގެ ތަޖުރިބާ ލިބިފައިވާ މީހެކެވެ.

މިނިސްޓްރީ އޮފް ހެލްތުގައި ވަކި ގޮތެއް ކަނޑައެޅި، ކްލިނިކް ތަކަށް ހުއްދަ ދިނުމުގެ ކުރީގައި ވެސް އެތައް ބަޔަކަށް ފަރުވާ ދީފައިވާ މަޒީދު އަކީ 2017 ގައި "ޙިޖާމާ ސެންޓަރ" ގެ ނަމުގައި ޙިޖާމާ ގެ ފަރުވާ ދިން ފަރާތެކެވެ.

މި ކްލިނިކާއި ގުޅޭގޮތުން މައުލޫމާތު ދެއްވަމުން އިލާޖް ގެ އޮފިޝަލަކު ވިދާޅުވީ އެ ކްލިނިކްގައި ޚިދުމަތް ދެއްވާ ހުރިހާ ޙިޖާމިސްޓުންނަކީ ވެސް އެލައިޑް ހެލްތު ކައުންސިލުގައި ރަޖިސްޓްރީ ކުރެވިފައިވާ މީހުން ކަމަށާއި ދިވެހިބޭސް ކުރުމަށް ޚާއްސަ ބޭފުޅުންނަކީ ވެސް އެކަމުގެ ދާއިރާގައި އެލައިޑުގައި ރަޖިސްޓްރީ ކުރެވިފައިވާ މީހުން ކަމަށެވެ. އަދި ކްލިނިކްގެ މަޤްސަދަކީ ޙިޖާމާގެ ފަރުވާ އާއި، ދިވެހިބޭސް ކުރުމުގެ ޚިދުމަތްތައް ރައްކާތެރިކަމާއި، އިތުބާރާއެކު ފޯރުކޮށްދެވޭނެ ނިޒާމެއް ޤާއިމުކުރުން ކަމަށާއި ⁠ކްލިނިކްގެ އަމާޒަކީ ބަލި މީހުންނަށް އެހީތެރިކަމެއްގެ ގޮތުގައި ނަބަވީ ބޭސްވެރިކަމާއި، ޤުދުރަތީ ދިވެހި ބޭހުގެ ފަރުވާ ފޯރުކޮށްދިނުން ކަމަށްވެސް އޮފިޝަލް ވިދާޅުވިއެވެ.

އަދި މިކްލިނިކުގައި ޙިޖާމާ ޖެހުމުގެ ކުރިން ބަލިމީހުން ޑައިގްނޯސް ކުރެވި، ޙިޖާމާ އާއި ބެހޭ މައުލޫމާތުތައް އެކަށީގެންވާ ވަރަށް ފޯރުކޮށްދެއެވެ. ނަމަވެސް ޑައިގްނޯސް ކުރުމަށް އިތުރު ފީ އެއް ނުނަގައެވެ.

ޢިލާޖް ޙިޖާމާއިން ދޭ ހިދުމަތްތަކުގެ ތެރޭގައި ހިމެނެނީ ދިވެހި ބޭސްކުރުމާއި ލޭ ނަގައިގެން އަދި ނުނަގާ ދެވޭ ތަފާތު ވައްތަރުގެ ޙިޖާމާގެ ފަރުވާތަކާއި ޑައިގްނޯސް ކުރުން (ބަލިމީހުން ބެލުން) އެވެ. އަދި ⁠ޚިދުމަތް ދެވޭ ޙިޖާމާގެ ތަފާތު ވައްތަރުތަކުގެ ތެރޭގައި

• ލޭނަގައިގެން ބަލިތަކަށް ޚާއްސަކޮށް ފަރުވާ ކުރުން.
• ފަޔަރ ކަޕިންގ
• ފުލް ބޮޑީ ޙިޖާމާ
• ބޮލަށް ޙިޖާމާ ޖެހުން
• ފޭޝަލް ޙިޖާމާ
• ބޭމްބޫ ޑްރައި މަސާޖް ކަޕިންގ
• ރައްކާތެރިކަމަށްޓަކައި ޖެހޭ ސުންނަތް ޙިޖާމާ
• ސްޕޯޓްސް ޙިޖާމާ

މީގެ އިތުރުން މި ކްލިނިކުގައި ފަރުވާ ދެވިގެންދަނީ އަންހެން ބޭފުޅުންނަށް އަންހެން ޙިޖާމިސްޓުންނެވެ. އަދި ފިރިހެން ބޭފުންނަށް ފިރިހެން ޙިޖާމިސްޓެކެވެ.

ޢިލާޖް ޙިޖާމާގައި ޙިޖާމާ ޖެހުމުގައި އެންމެ ރަނގަޅު ފެސިލިޓީތަކާއި، ޒަމާނީ އާލާތްތައް ބޭނުންކުރުމަށް މަސައްކަތް ކުރެއެވެ. އަދި ޙިޖާމާ ޖެހުމަށް އެކަށީގެންވާ ސާފުތާހިރު މާހައުލެއް ދެމެހެއްޓުމަށްޓަކައި އެތައް ފިޔަވަޅުތަކެއް އެޅިގެންދާކަމަށް އޮފިޝަލް ވިދާޅުވިއެވެ.

⁠ޢިލާޖް ޙިޖާމާގެ އުންމީދަކީ ޕޭޝަންޓުންނާއި ގާތް ގުޅުމެއް ބާއްވާ، އެމީހުންގެ މައުލޫމާތުތައް ސިއްރު ކޮށްދިނުމުގެ ޔަޤީންކަން އެރުވުން ކަމަށް އޮފިޝަލް ވިދާޅުވިއެވެ. އޮފިޝަލް ވިދާޅުވީ ⁠ކްލިނިކްގެ ތަޞައްވުރަކީ ކޮންމެ މީހަކީ ވެސް ޚާއްސަ މީހެއްގެ ގޮތުގައި ދެކި، އެމީހެއްގެ ޝަކުވާތަކަށް ޙައްލެއް ހޯދައި ދިނުމަށް އެހީތެރިވެ ދިނުން ކަމަށާއި އެގޮތުން ޢިލާޖްގައި ފަރުވާ ކުރެވޭ ހުރިހާ ޕޭޝަންޓުންނަކީ ވަކި ކޭސް އެއްގެ ގޮތުގައި ބެލެވި، ވަކި ޓްރީޓްމަންޓް ޕްލޭން އެއްގެ ދަށުން، ބަލިމީހާ އާއި އެންމެ އެކަށީގެންވާ ގޮތަށް، ރައްކާތެރިކަމާއެކު ފަރުވާ ފޯރުކޮށް ދިނުމަށް މަސައްކަތްތައް ކުރެވެމުންދާ ކަމަށެވެ.

އިލާޖް ހިޖާމާ ކްލިނިކް ހުންނަނީ އަމީނީ މަގު ފެން ބިލްޑިންގް ކުރިމަތީގައި ހުންނަ އެމް7 ބުކްޝޮޕާއި އިންވެގެން ހުންނަ އިމާރާތް ކަމަށްވާ މއ. ތަޅަމުދިގޭގެ 5 ވަނަ ފްލޯރ ގައި އެވެ. އަދި އެ ކްލިނިކް ހުޅުވިފައި ހުންނަ ގަޑިތަކަކީ ހެނދުނު 9:30 އިން ރޭގަނޑު 6:00 އަށް އަދި ރޭގަނޑުގެ 8:00 އިން 11:00 އަށެވެ. މިވަގުތުގެ ތެރެއިން ނަމާދު ވަގުތު ތަކުގައި ފިޔަވާ ކޮންމެ ވަގުތެއްގައި ވެސް އާންމުކޮށް ކްލިނިކު ހުންނާނީ ހުޅުވިފައި އެވެ.

އޮފިޝަލް ވިދާޅުވީ މުސްތަގްބަލުގައި ރާއްޖޭގައި އިތުރު ޙިޖާމިސްޓުން ތަމްރީނުކުރުމާއި، ކްލިނިކްގެ ޚިދުމަތްތައް ފުޅާ ކުރުމާއި، ޙިޖާމާގެ ފަރުވާ ލިބިގަންނަ ތަފާތު ބަލިމީހުންގެ ކުރިއެރުންތައް ބަލާ، އެކަންކަން ދިރާސާ ކޮށްގެން އިތުރު ކުރިއެރުންތައް ހޯދުމަށް ކްލިނިކުން މަސައްކަތްކުރާނެ ކަމަށެވެ.