ގެދޮރު ގެއްލިފައިވާ ޣައްޒާ ރައްޔިތުން ދިރިއުޅެމުންދިޔަ ޓެންޓުތަކަކަށް ޔަހޫދީން ބޮން އަޅައި 11 މީހަކު ޝަހީދުކޮށްލައިފި

ގެދޮރުގެއްލިފައިވާ ޣައްޒާ ރައްޔިތުން ދިރިއުޅެމުންދިޔަ ޓެންޓުތަކަކަށް ޔަހޫދީން ބޮން އަޅައި ގިނަ ބަޔަކު ޝަހީދުކޮށްލައިފި އެވެ.

އަލްޖަޒީރާ އަރަބިކްއިން ރިޕޯޓުކުރާ ގޮތުގައި ގެދޮރު ގެއްލިފައިވާ މީހުން ދިރިއުޅޭ ޓެންޓުތަކަށާއި ޣައްޒާގެ މެދުގައި ހުންނަ ޗެރިޓީ ފުޑް ބޭންކަކަށް އިސްރާއީލުން ދިން ޑްރޯން ހަމަލާތަކުގެ ސަބަބުން ފަލަސްތީނުގެ 11 މީހަކު ވަނީ ޝަހީދުވެފައި އެވެ.

އަދި މި ހަމަލާގައި ގިނަ ބަޔަކު ޒަހަމްވެފައިވާކަމަށާއި އޭގެ ތެރޭގައި ކުޑަކުދިންތަކެއްވެސް ހިމެނޭ ކަމަށް ރިޕޯޓުތައް ބުނެއެވެ.

ބައެއް ރިޕޯޓުތައް ބުނާގޮތުގައި ޔަހޫދީން މި ހަމަލާދިން ވަގުތަކަކީ ޣައްޒާގައި ރޯދަ ވީއްލުމަށް އެ ޓެންޓުތަކުގެ ތިބި މީހުން ތައްޔާރުވަމުން ދިޔަ ވަގުތެކެވެ.

ޔަހޫދީން ހުއްޓުމެއްނެތި ޣައްޒާއަށް ދެމުންދާ ހަމަލާތަކުގައި ފާއިތުވި 24 ގަޑިއިރުގެ ތެރޭގައި 38 މީހަކު ވަނީ ޝަހީދުކޮށްލާފައި އެވެ. އަދި 17 މަސް ދުވަސްވީ މި ހަނގުރާމާފައި ޖުމުލަ ޝަހީދުވި މީހުންގެ އަދަދު ވަނީ 50,200 އާއި ގާތްކޮށްފައި އެވެ.