ރޯދަ މަހު ވެމްކޯއިން ތިނަދޫ ސިޓީގައި ކުނި ނެގުމުގެ ޚިދުމަތް ދޭ ގަޑިތައް އިއުލާނުކޮށްފި

ކުރިޔަށް އޮތް ރަމަޟާން މަހު ވެމްކޯއިން ތިނަދޫ ސިޓީގައި ކުނި ނެގުމުގެ ޚިދުމަތް ދޭ ގަޑިތައް އިއުލާނުކޮށްފި އެވެ.

އެކުންފުނިން މިއަދު ކުރި އިއުލާނެއްގައި ބުނީ ރަމަޟާންމަހު ތިނަދޫ ސިޓީގެ ގޭބިސީތަކުން ކުނި ނެގުމުގެ ޚިދުމަތް ދޭ ގަޑިތަކަށް ބަދަލު އައިސްފައިވާކަމަށެވެ. އެގޮތުން އައު ބަދަލާއި އެކު ރަމަޟާން މަހު ކުނި ނެގުމުގެ ހިދުމަތް ދޭނީ ހެނދުނު 07:00 އިން ފެށިގެން މެންުދުރު 13:00 އަށް ކަމަށް އެކުންފުނިން ބުނެއެވެ.

މީގެ އިތުރުން ވެމްކޯ ތިނަދޫ ރިސޯސް ސެންޓަރު ހުޅުވާ ގަޑިތަކަށްވެސް ވަނީ މިހާރު ބަދަލުތަކެއް ގެނެސްފައި އެވެ. އެގޮތުން ރަމަޟާން މަހުގައި ވެމްކޯ ތިނަދޫ ރިސޯސް ސެންޓަރު ހުޅުވުމަށް ހަމަޖެހިފައިވަނީ ހުކުރު ދުވަސް ފިޔަވާ ހަފްތާގެ ކޮންމެ ދުވަހަކު ހެނދުނު 09:00 އިން ފެށިގެން ހަވީރު 17:00 އަށެވެ. އަދި ހުކުރު ދުވަހު އެސެންޓަރު ހުޅުވުމަށް ހަމަޖެހިފައިވަނީ މެންދުރު ފަހު 14:00 އިން ހަވީރު 17:00 އަށެވެ.

ވެމްކޯއިން ރަމަޟާން މަހާއި ދިމާކޮށް އެކުންފުނީގެ ހިދުމަތްތައް ދެމުން އަންނަ ސިޓީތަކާއި ރަށްތަކުގައި ހިދުމަތްދޭނެ ގަޑިތައް ކަނޑައަޅައި އިއުލާނުކުރަން މިހާރު ވަނީ ފަށާފައި އެވެ.

ތިނަދޫ ސިޓީގައި ވެމްކޯގެ ހިދުމަތް ރަސްމީކޮށް ފެށީ މިދިޔަ އަހަރުގެ ތެރޭގައި އެވެ.