logoEN
Sto top
ދިއްދޫގައި ހިދުމަތް ފެށުން ލަސްވީ އާލާތްތައް ލިބުމުގައި ހުރި ދަތިތަކެއް ސަބަބުން, ދާދި އަވަހަށް ހިދުމަތްދޭން ފެށޭނެ - ވެމްކޯ

ދިއްދޫގައި ހިދުމަތް ފެށުން ލަސްވީ އާލާތްތައް ލިބުމުގައި ހުރި ދަތިތަކެއް ސަބަބުން, ދާދި އަވަހަށް ހިދުމަތްދޭން ފެށޭނެ - ވެމްކޯ

އަހުމަދު ޝުރާއު

logo

3/16/2025, 3:39:50 PM

# ވެމްކޯ

--

ހއ ދިއްދޫގައި ވެމްކޯގެ ހިދުމަތް ފެށުން ލަސްވެފައިވަނީ އާލާތްތައް ލިބުމުގައި ހުރި ދަތިތަކެއް ސަބަބުންކަމަށް އެކުންފުނިން މިރޭ ބުނެފި އެވެ.

Wamco

އެކުންފުނިން މިކަން ހާމަކުރީ ރަމަޟަން މަހުގެ ކުރިން ދިއްދޫގައި ވެމްކޯގެ ހިދުމަތް ފެށޭނެ ކަމަށް ރައީސް ޑރ މުހައްމަދު މުއިއްޒު ވިދާޅުވި ވިދާޅުވުމާއި އެއްގޮތަށް ހިދުމަތް ނުފެށޭ ކަމަށްބުނެ ރާއްޖޭގެ މިޑިއާއަކުން ގެނެސްދިން ހަބަރަކާއި ގުޅިގެންނެވެ,. އެގޮތުން ވެމްކޯއިން މިރޭ ނެރުނު ބަޔާނެއްގައި ބުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އެ ކޯޕަރޭޝަންގެ މެނޭޖިންގ ޑައިރެކްޓަރ މުޖުތަބާ ޖަލީލު، ވިދާޅުވެފައިވާ ފަދައިން އެކުންފުނީގެ ޚިދުމަތް ހއ. ދިއްދޫގައި ފެށުމަށް މިހާރު ވާންޖެހޭ އެންމެ ފަހުގެ ތައްޔާރީތައް ވަނީ ނިމިފައި ކަމަށާއި އަދި ރައީސްގެ ވައުދާއި އެއްގޮތަށް މި ރަމަޟާން މަސް ފެށުމުގެ ކުރިއަށް ވެމްކޯގެ ޚިދުމަތް ދިއްދޫގައި ފެށުމުގެ އަމަލީ މަސައްކަތް ފެށުނު ކަމަށެވެ.

އެގޮތުން މި ތައްޔާރީތަކުގެ ތެރޭގައި ކުނި މެނޭޖްކުރުމަށް ބޭނުންވާ އަސާސީ ވަސީލަތްތައް ޤާއިމްކުރުމާއި، އިދާރީ އިންތިޒާމްތައް ހަމަޖެއްސުމުގެ އިތުރުން މުވައްޒަފުން ނެގުމުގެ މަސައްކަތްވެސް ވަނީ މިހާރު މުޅިން ނިމި އޮފީހުގެ އިދާރީ މަސައްކަތްތައް ފެށޭ ވަރަށް ހަމަޖެހިފައި ކަމަށް ވެމްކޯއިން ބުނެއެވެ.

ވެމްކޯއިން ބުނީ ހއ ދިއްދޫ ކުނިކޮށީގެ ފެންސު އެޅުމުގެ މަސައްކަތް ދިއްދޫ ކައުންސިލްގެ ބެލުމުގެ ދަށުން ނިމުނުހާ އަވަހަކަށް ޚިދުމަތް ދޭން ފެށޭނެ ކަމަށާއި މި މަސައްކަތަކީ ކުނި މެނޭޖްކުރުމުގެ ޚިދުމަތް ފެށުމުގެ ކުރިން ނިންމަންޖެހޭ އެންމެ މުހިންމު އެއް މަސައްކަތް ކަމަށެވެ. އަދި މި މަސައްކަތް ނިމުމުން، ތިމާވެށްޓާ ރައްޓެހި ގޮތެއްގައި ކުނި މެނޭޖްކުރުމުގެ މަސައްކަތް ފެށިގެންދާނެ ކަމަށާއި ރަމަޟާންމަހަށް އެ ކޯޕަރޭޝަންގެ ޚިދުމަތް ދިނުމުގެ އަމަލީ މަސައްކަތް ނުފެށި ލަސްވެފައިވަނީ މި މަސައްކަތް ނިންމުމުގައި ހުރި ބައެއްކަހަލަ ގޮންޖެހުންތަކާއި ގުޅިގެން ކަމަށެވެ.

އަދި މިވަގުތު މަސައްކަތް ލަސްވެފައިވަނީ މަސައްކަތަށް ބޭނުންވާ ބައެއް ކަހަލަ އާލާތްތައް ލިބުމުގައި ހުރި ދަތިތަކެއް ސަބަބުން ކަމަށާއި މި ދަތިތައް ހައްލުކުރުމަށް އެ ކޯޕަރޭޝަނާއި ހއ ދިއްދޫ ކައުންސިލުން ގުޅިގެން ދަނީ މަސައްކަތްކުރަމުން ކަން ހާމަކޮށް ވެމްކޯއިން ބުނީ ވީ އެންމެ އަވަހަކަށް މި ދަތިތައް ހައްލުކުރެވިގެންދާނެ ކަމަށެވެ.

އަދި ޚިދުމަތް ފެށުމަށްޓަކައި ބޭނުންވާ އެންމެހައި މެޝިނަރީތަކާއި އާލާތްތައް ދިއްދޫއަށް ފޯރުކޮށްދިނުމަށް ވަނީ ހަމަޖެހިފައި ކަމަށާއި މީގެ ތެރޭގައި ކުނި އުފުލުމަށް ބޭނުންކުރާ ކޮމްޕެކްޓަރުތަކާއި، ކުނި ނެގުމަށް ބޭނުންކުރާ ޚާއްޞަ އުޅަނދުތަކާއި، ކުނި މެނޭޖްކުރުމަށް ބޭނުންވާ އެހެނިހެން މެޝިނަރީތައް ހިމެނޭ ކަމަށް ވެމްކޯއިން ބުނެއެވެ.

އަދި މި ހުރިހާ ވަސީލަތްތަކެއް މާލެއިން ދިއްދޫއަށް ފޮނުވުމުގެ އިންތިޒާމްތައް ވެސް މިހާރު ވަނީ ހަމަޖެހިފައިކަން ވެމްކޯއިން ހާމަކުރެއެވެ.

ވެމްކޯއިން ބުނީ މި ފެށޭ އޭޕްރީލް މަހުގައި ވެމްކޯގެ އިދާރީ އޮފީހުގެ ޚިދުމަތް ރައްޔިތުންނަށް ލިބޭނެ ކަމަށާއި މި އޮފީހުން ކުނި މެނޭޖްކުރުމާ ގުޅޭ އެންމެހައި އިދާރީ ޚިދުމަތްތައް ދިއްދޫގެ ރައްޔިތުންނަށް ފޯރުކޮށްދެވިގެންދާނެ ކަމަށެވެ. މީގެ ތެރޭގައި ކުނި އުކާލުމުގެ ޚިދުމަތަށް ރަޖިސްޓަރީވުމާއި، ބިލްކުރުމުގެ ޚިދުމަތްތަކާއި ގުޅޭ ކަންކަން ހިމެނެއެވެ.

ވެމްކޯގެ ޚިދުމަތް ހއ. ދިއްދޫގައި ފެށުމުން، އެ ރަށުގެ ކުނި މެނޭޖްކުރުމުގެ ނިޒާމު ހަރުދަނާވެ، ރައްޔިތުންނަށް ފެންވަރު ރަނގަޅު ދުމަތެއް ލިބިގެންދާނެކަން ފާހަގަކޮށް ވެމްކޯއިން ބުނީ މި ޚިދުމަތުގެ ސަބަބުން ރަށުގެ ތިމާވެށި ރައްކާތެރިކޮށް، ސާފު މާޙައުލެއް ޤާއިމްކުރެވިގެންދާނެ ކަމަށެވެ.

އެކުންފުނޫގެ ބަޔާން ނިންމާލަމުން ބުނެފައިވަނީ އެކުންފުނިން އަބަދުވެސް މަސައްކަތް ކުރަމުން ގެންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ސިޔާސަތުތަކާއި އެއްގޮތްވާ ގޮތުގެ މަތިން، ރާއްޖޭގެ ރަށްތަކުގައި ކުނި މެނޭޖްކުރުމުގެ ހަރުދަނާ ނިޒާމެއް ޤާއިމްކުރުމަށް ކަމަސާއި މި ގޮތުން، ރައީސުލްޖުމްހޫރިއްޔާގެ ރިޔާސީ ވަޢުދުފުޅުތައް ފުއްދުމަށްޓަކައި ދޭންޖެހޭ އެންމެހާ އެއްބާރުލުމެއް ދިނުމަށް އެ ކޯޕަރޭޝަން އަބަދުވެސް ތައްރާރަށް އޮންނާނެކަމަށެވެ.

Maldivian
ކޮމެންޓް
Maldivian
ފަހުގެ
STELCO Inside