ފެނަކައިގެ ދަށުން ހިންގަމުންދާ ހުރިހާ އައިސްޕްލާންޓުތަކެއް މިފްކޯއާއި ހަވާލުކޮށްފި

ފެނަކައިގެ ދަށުން ހިންގަމުން ދިޔަ އައިސް ޕްލާންޓްތައް މިފްކޯގެ ދަށަށް ބަދަލުކޮށްފި އެވެ.

މިއަދު އޮތް ޚާއްސަ ރަސްމިއްޔާތެއްގައި މިކަމާއި ގުޅޭ ޚާއްސަ އެއްބަސްވުމުގައި ދެފަރާތުން ވަނީ ސޮއިކޮށްފައި އެވެ. އެގޮތުން މި އެއްބަސްވުމުގައި ފެނަކައިގެ ފަރާތުން ސޮއި ކުރެއްވީ އެމްޑީ މޭޖަރ (ރިޓަޔާރޑް) މުޙައްމަދު ނަޖާޙް އެވެ. އަދި މިފްކޯގެ ފަރާތުން ސޮއި ކުރެއްވީ ސީއީއޯ ޑރ. ވިޓާލީ ލުބިމޯވް އެވެ.

މިކަމާއި ގުޅިގެން މިއަދު މިފްކޯއިން ބުނީ، ފެނަކަ އިން ހިންގަމުން އައި 14 އައިސްޕްލާންޓަކާއި މިފްކޯއިން ހަވާލުވެފައިވާ ކަމަށާއި އެ ކުންފުނީގެ ޓީމްތަކުން މި އައިސްޕްލާންޓްތަކުގެ ފުލް އޮޕަރޭޝަންތައް އަލުން ފަށަން މިހާރު މަސައްކަތް ފަށާފައިވާ ކަމަށެވެ.

މިފްކޯގެ ދަށުން ހިންގަމުން އައި 14 އައިސްޕްލާންޓެއް ހިންގުން ފެނަކަ ކޯޕަރޭޝަނާ ހަވާލުކުރީ 2022 ވަނަ އަހަރު އެދެކުންފުނީގެވެސް ކުރީގެ މެނޭޖްމެންޓުންނެވެ. ނަމަވެސް އަލުން މިފްކޯއާއި އައިސްޕްލާންޓުތައް ހަވާލުކުރަން ފެނަކައިން މަސައްކަތް ފެށީ އެމަޝްރޫއުގެ ސަބަބުން ކުންފުންޏަށް ބޮޑެތި ގެއްލުންތައް ވަމުންދިއުމާއި، ކުންފުނީގައި އައިސް ޕްލާންޓް ހިންގުމުގެ ފަންނީ ޤާބިލުކަން ނެތުމާއި އަދި އެ މަސައްކަތަކީ ކުންފުނީގެ މޭންޑޭޓާއި ޚިލާފުވެސް މަސައްކަތަކަށްވާތީ އެވެ.

އެގޮތުން ރައީސް މުއިއްޒުގެ ވެރިކަމާއި އެކު އައު މެނޭޖްމެންޓުގެ ދަށުން އައިސްޕްލާންޓުތައް އަލުން މިފްކޯއާއި ހަވާލުކުރުމުގެ މަސައްކަތް ފެށިއެވެ.