
ސިޔާސީ ޕާޓީތަކަށް މެންބަރުން ދަފްތަރުކުރުމުގައި އީ-ފާސް ބޭނުންކުރުމަށް މަޝްވަރާތައް ފަށައިފި
# ސިޔާސީ ޕާޓީތައް--
ސިޔާސީ ޕާޓީތަކަށް މެންބަރުން ދަފްތަރުކުރުމުގައި އީ-ފާސް ބޭނުންކުރުމާ ގުޅޭގޮތުން، ނެޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީ(އެން.ސީ.އައިޓީ)ގެ އިސްބޭފުޅުންނާއެކު، އިލެކްޝަންސް ކޮމިޝަނުން ބައްދަލުކޮށްފިއެވެ.

މިއަދު އީސީގެ މައި އިދާރާގައި ކުރިއަށްގެންދިޔަ މި ބައްދަލުވުމުގައި، އެން.ސީ،އައިޓީގެ ފަރާތުން ސްޓޭޓް މިނިސްޓަރ ޑރ.މުޙައްމަދު ކިނާނަތާއި ޑެޕިއުޓީ މިނިސްޓަރ މުޙައްމަދު މައުރޫފް ބައިވެރިވެ ވަޑައިގަތެވެ. އަދި އީސީގެ ފަރާތުން އެ ކޮމިޝަނުގެ ފަސް މެންބަރުންނާއި ސެކްރެޓަރީ ޖެނެރަލްގެ އިތުރުން ކަމާގުޅުންހުރި ޑިވިޜަންތަކާއި ސެކްޝަންތަކުގެ ވެރިން ބައިވެރިވިއެވެ.
އީސީން ބުނީ މި ބައްދަލުވުމުގެ މައިގަނޑު މަގްސަދަކީ، ސިޔާސީ ޕާޓީތަކަށް މެންބަރުން ވެއްދުމުގެ ނިޒާމު ޑިޖިޓަލްކޮށް، އީފާސް މެދުވެރިކޮށް ސިޔާސީ ޕާޓީތަކަށް މެންބަރުން ވެއްދުމަށް ޕޯޓަލް ބޭނުންކުރަން ފެށުމުގެ ކުރިން ކުރަންޖެހޭ ޓެކްނިކަލް ކަންތައްތަކާމެދު މަޝްވަރާކުރުން ކަމަށެވެ. އަދި މި ބައްދަލުވުމުގައި ސިޔާސީ ޕާޓީތަކުން ހުށަހަޅާފައިވާ ހިޔާލުތަކައި ކަންބޮޑުވުންތަކާ ގުޅޭގޮތުންވެސް މަޝްވަރާކުރެވުނު ކަމަށް އީސީން ބުނެއެވެ.
މީގެ އިތުރުން، ސިޔާސީ ޕާޓީތަކުގެ މެންބަރުންގެ ދަފްތަރާ ގުޅިގެން ލިބޭ ޝަކުވާތަކާއި ފޯމުތައް ޕްރޮސެސް ކުރުމުގައި ދިމާވާ ދަތިތަކާގުޅޭ ގޮތުންނާއި ދަތިތައް ހައްލުކުރުމަށް އެޅިދާނެ ފިޔަވަޅުތަކާ ގުޅޭގޮތުން ސިޔާސީ ޕާޓީތަކާއި ކަމާ ގުޅުން ހުރި ސަރުކާރުގެ ވުޒާރާތަކާ ބައްދަލުކުރުމަށް އެކޮމިޝަނުން ވަނީ ތާވަލުކުރެވިފައެވެ.