އިހަވަންދޫ ފިޝަރީސް ކޮމްޕްލެކްސް އާއެކު ރާއްޖޭގެ މަސްވެރިކަމުގެ ސިނާއަތް އައު ހަރުފަތަކަށް!

މަސްވެރި ސިނާއަތް ތަރައްޤީކޮށް ސިންދަފާތުކޮށް އަދި މަސްވެރިކަމުގެ ސިނާއަތުން ލިބޭ އާމްދަނީ އިތުރުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންމެ މުހިންމު ވަޢުދުފުޅުތަކުގެ ތެރެއިން އެއް ވަޢުދުފުޅެވެ.

މިވަގުތު މަސްވެރިކަމުގެ ދާއިރާއަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ މަސް ޕްރޮސެސްކޮށް ރައްކާ ކުރާނެ ވަސީލަތްތައް މަދުވުމެވެ. ވޭތުވެދިޔަ ދުރު މާޒީއަށް ބަލާއިރު ޕްރޮސެސިންގް ދާއިރާއަށް މާ ބޮޑު އަހައްމިއްޔަތުކަމެއް ދެވިފައި ނެތްކަން ރައީސް ޑރ. މުޢިއްޒު ވަނީ މީގެ ކުރިން ފާހަގަކުރައްވައިފައެވެ.

ރައީސުލްޖުމުހޫރިއްޔާގެ ވަޢުދުފުޅާއި އެއްގޮތަށް މަސްވެރި ސިނާއަތުގެ އެންމެހާ ކަންކަން ކުރުމަށް މި ސަރުކާރުން އަންނަނީ އެތަކެއް މަސައްކަތްތަކެއް ކުރަމުންނެވެ. މިގޮތުން އިއްޔެ ހއ އިހަވަންދޫގައި އެޅިގެން އެދިޔައީ ދިވެހިރާއްޖޭގެ މަސްވެރިކަމުގެ ސިނާއަތް އައު ހަރުފަތަކަށް ގެންދިޔުމުގެ ބިންގަލެއް ކަމަށް މަސްވެރިކަމާއި ބެހޭ ވުޒާރާއިން ބުނެއެވެ. އަދި އެއީ ފަހުގެ ތާރީޚެއްގައި މަސްވެރިކަމުގެ ދާއިރާއިން ބޮޑުތިލަދުންމަށްޗަށް ގެންނަ އެންމެ ބޮޑު ކުރިއެރު ގޮތުގައި ވަނީ ސިފަކޮށްފައި އެވެ.

އިއްޔެ ހއ އިހަވަންދޫގައި އޮތް ރަސްމިއްޔާތުގައި ހއ. އިހަވަންދޫ ފިޝަރީޒް ކޮމްޕްލެކްސްގެ ބިންގާ އަޅުއްވައިދެއްވީ ވަޒީރު އަޙްމަދު ޝިޔާމްއާއި މިފްކޯގެ ސީ.އީ.އޯ ޑރ. ވިތާލީއާ އިހަވަންދޫ ކައުންސިލުގެ ރައީސް ސަބާހުއެވެ.

ރައީސް ޑރ މުޢިއްޒު ހއ އިހަވަންދޫ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން މަސްވެރި ސިނާއަތުގެ މުހިންމުކަމަށް ވަނީ އަލިއަޅުއްވާލައިފައެވެ. ހއ. އިހަވަންދޫ ރައްޔިތުންނާއި ބައްދަލުކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިއަދު ބިންގާ އެޅުނު މި މަޝްރޫޢަކީ ޖުމްލަކޮށް މުޅި ރާއްޖޭގައި މަސްވެރިކަން ތަރައްޤީ ކުރެއްވުމަށް ކުރެވެމުންދާ މަސައްކަތްތަކުގެ ތެރެއިން އެރަށުގައި ހިންގުމަށް ހަމަޖެހިފައިވާ މުހިންމު މަސައްކަތެއްކަން ވަނީ ފާހަގަކުރައްވައިފައެވެ. އަދި މިއީ އެމަނިކުފާނުގެ ވަޢުދުފުޅެއްކަން ވަނީ ފާހަގަކުރައްވައިފައެވެ. މި މަޝްރޫއުގެ އިދާރީ އަދި ފަންނީ މަސައްކަތްތަކާއެކީ ކުރިއަށް ގޮސް މި މަޝްރޫޢުގެ އަމަލީ މަސައްކަތް މެއި މަހު ފެށިގެންދާނެކަމަށް ރައީސުލްޖުމުހޫރިއްޔާގެ ވާހަކަފުޅުގައި ވަނީ ފާހަގަކުރައްވައިފައެވެ. ބަނދަރާއެކު މި މަޝްރޫޢުގެ ޖުމްލަ އަގަކީ 474 މިލިއަން ރުފިޔާއެވެ.

މި މަޝްރޫއުގައި ހިމެނެނީ:

1. 1000 ޓަނުގެ ކޯލްޑް ސްޓޯރޭޖެ

2. 50 ޓަނުގެ ބްރައިން ފްރީޒިންގ

3. ފެސިލިޓީއަށް ބޭނުންވާ އޮފީސް އިމާރަތް އަދި ގުދަން

4. 7 މީޓަރު ފުން 1000މީޓަރުގެ ދިގުމިން ހުންނަ މަގަތު ފާލަން

5. 3 ޕޮއިންޓުން މަސްކިރޭ 4.5 މީޓަރު ފުން ފާލަން ޖެޓީއާއެކު

އަދި މި މަޝްރޫއު ނިމުމާއެކީ 150 ވަޒީފާ އުފެދި އެތަކެއް ފުރުސަތުތަކެއް ރަށަށް ފަހިވެގެންދާނެ ކަމަށް ވަނީ ފާހަގަކުރައްވާފައެވެ. މި މަޝްރޫޢު ނުހުއްޓި ކުރިޔަށް ގޮސް 18 މަސް ތެރޭގައި ނިންމާލެވޭނެ ކަމަށް ރައީސް ޑރ. މުޢިއްޒު ވަނީ ފާހަގަކުރައްވާފައެވެ.

މި މަޝްރޫއު ނިމުމާއެކު އުތުރުގެ މަސްވެރިންނަށް ވަރަށް ބޮޑެތި ލުއިފަސޭހަތަކެއް އަދި މުޅި މަސްވެރިކަމުގެ ސިނާއަތަށް ވަރަށް ބޮޑެތި ކުރިއެރުންތައް ލިބިގެންދާނެ ކަމަށް މަސްވެރިކަމާއި ބެހޭ ވުޒާރާއިން ބުނެއެވެ.