ފޭސް 2 ގެ އެޕާޓްމަންޓަކުން ވަގަށްނެގި ތަކެތި ހޯދައި ވެރިފަރާތާ ހަވާލުކޮށްފި

ހުޅުމާލެ ފޭސް 2 ގެ އެޕާޓްމަންޓަކުން ވައްކަންކޮށްފައިވާ މައްސަލައާ ގުޅިގެން އެ ތަކެތި ހޯދުމަށްކުރި މަސައްކަތުން ތަކެތި ހޯދައި ވެރިފަރާތާ ހަވާލުކޮށްފިއެވެ.

ފުލުހުން ބުނޯ މި މައްސަލަ ހުށަހަޅާފައިވަނީ މި ޖަނަވަރީ މަހު 22 ވަނަ ދުވަހުގެ ހެނދުނުގެ ވަގުތެއްގައި ކަމަށެވެ.

މި މައްސަލައާ ގުޅިގެން ފޭސް 2 ޕޮލިސް ސްޓޭޝަނުން ކުރި މަސައްކަތުން، ތުހުމަތުކުރެވޭ މީހާ ހޯދައި ސުވާލުކޮށް އެ ތަކެތި ވަނީ ހޯދާފައެވެ. އޭގެ ތެރޭގައި ސެންޓުފުޅި ތަކަކާއި އަންނައުނާއި ބޫޓު އަދި އަވިއައިނު ހިމެނެއެވެ. މި ތަކެތީގެ އަގަކީ 2000 ޑޮލަރު ކަމަށް ވެރިފަރާތުން މައުލޫމާތުދީފައިވެއެވެ.

މި މައްސަލައާ ގުޅިގެން މީހަކު ހައްޔަރުކޮށްފައެއް ނުވާކަން ފުލުހުން ހާމަކުރެއެވެ.މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.