ފުލުހުންގެ ޚިދުމަތުގެ މިއަހަރުގެ ކަލަންޑަރު ސީޕީއަށް އަރުވައިފި

ދިވެހި ފުލުހުންގެ ޚިދުމަތުން މިއަހަރަށް ހާއްސަކޮށްގެން ތައްޔާރުކުރި ކަލަންޑަރު ކޮމިޝަނަރ އޮފް ޕޮލިސް ޢަލީ ޝުޖާއުއަށް އަރުވައިފިއެވެ.

ކޮމިޝަނަރގެ އޮފީހުގައި އިއްޔެ ބޭއްވި ރަސްމިއްޔާތުގައި، މި ކަލަންޑަރު ކޮމިޝަނަރއަށް އެރުވީ ކަލަންޑަރުގައި ހިމެނޭ ފޮޓޯތަކުގައި ބައިވެރިވި ކުޑަކުދިންނެވެ.

މި ރަސްމިއްޔާތުގައި، ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝަމީމް، ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓު ހެޑް ޗީފް ސުޕްރިންޓެންޑެންޓް އޮފް ޕޮލިސް ފާޠިމަތު ނަޝްވާ، ޕަބްލިކް އެފެއާޒް ހެޑް ޗީފް އިންސްޕެކްޓަރ އޮފް ޕޮލިސް ޢަބްދުﷲ ފިރުޝާން ޢަލީ، ގްރެފިކްސް އެންޑް ޕްރޮޑަކްޝަން ހެޑް އިންސްޕެކްޓަރ އޮފް ޕޮލިސް މުޙައްމަދު ރިފްއަތު ނަސީމް އަދި ކަލަންޑަރު ޓީމު ބައިވެރިވެލެއްވިއެވެ.

އެހެން އަހަރުތަކާ ހިލާފަށް މިއަހަރުގެ ކަލަންޑަރު ތައްޔާރުކޮށްފައިވަނީ ކުޑަކުދިން މެދުވެރިކޮށް ފުލުހުންގެ މަސައްކަތްތައް ދައްކުވައިދިނުމަށާއި ފުލުހުންގެ އަސާސްތައް ރަމްޒުކޮށްދިނުމަށެވެ.

‘’އަދުގެ ކުޑަކުދިން މާދަމާގެ ޚިދުމަތްތެރިން'' މި ތީމުގެ ދަށުން ތައްޔާރުކޮށްފައިވާ މި ކަލަންޑަރުގައި، ކުޑަކުދިން ފެނިގެންދާނީ ފުލުހުން ބޭނުންކުރާ އެކި ޔުނީފޯމުގައެވެ. އެގޮތުން، ކުޑަކުދިން ފުލުހުންގެ މަސައްކަތް ދައްކުވައިދީ އަދި ތަފާތު އެކި ކަހަލަ ސީންތަކުގައި ހަރަކާތްތެރިވާ މަންޒަރު މި ކަލަންޑަރުން ފެނިގެންދާނެއެވެ.

ކަލަންޑަރަށް ކޮމިޝަނަރ އޮފް ޕޮލިސް ޢަލީ ޝުުޖާއު ދެއްވާފައިވާ އައު އަހަރުގެ ތަހުނިޔާގެ މެސެޖުގައި ވަނީ އަދުގެ ކުޑަކުދިންނަކީ މި ގައުމުގެ މުސްތަގުބަލަށް ވީހިނދު، މާތްވި އިސްލާމްދީނާއި ދިވެހި ގައުމުދެކެ ލޯބިވާ ހަރުދަނާ ޖީލެއް ބިނާކުރުމަށް އަޅުގަނޑުމެން އަޒުމް ކަނޑައަޅަން ޖެހޭ ކަމަށާ އަދި މިއަދުގެ މައުސޫމް ދަރިންނަކީ މާދަމާ މިގައުމުގެ ސަލާމަތާއި ރައްކާތެރިކަން ކަށަވަރުކުރުމަށް ތިބި ހީވާގި ޒުވާނުންކަމަށް ވިދާޅުވެފަވެ.