ބޭރުގެ ފާދިރީއަކު ރާއްޖޭގައި ރޫހާނީ ފަރުވާގެ ހިދުމަތްތަކެއް ދޭ މައްސަލައެއް!

ބޭރުގެ ފާދިރީއަކު ރާއްޖޭގައި ރޫހާނީ ފަރުވާގެ ހިދުމަތްތަކެއް ދޭ މައްސަލައެއް ފެންމަތިވެއްޖެ އެވެ.

ފުލުހުން މިއަދު ބުނީ "މާސްޓަރ ދުރްގާ ރާއޯ ގުރުޖީ" ނަމަކަށް ކިޔާ މީހަކު ދިވެހިރާއްޖޭގައި ރޫހާނީ ފަރުވާގެ ހިދުމަތްތަކެއް ދޭކަމަށް ބުނެ ސޯޝަލް މީޑިއާގެ މަންސަތަކުގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ.

އަދި މި މައްސަލައާ ގުޅިގެން، ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ކުރަންޖެހޭ މަސައްކަތް ކަމާބެހޭ އިދާރާތަކާ ގުޅިގެން ފުލުހުން ކުރަމުންދާކަން ވެސް އެއިދާރާއިން ވަނީ ފާހަގަކޮށްފަ އެވެ.

ފުލުހުން އިތުރަށް ބުނީ ދިވެހިންގެ ސަގާފަތާއި ދީނާ ޚިލާފު މިފަދަ ކަންކަމުގެ މަޢުލޫމާތު އެކަކު އަނެއްކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް ޤާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމުގައި ދެކޭ ކަމަށާއި އެހެންކަމުން، މިފަދަ އިޝްތިހާރެއް ފެނިވަޑައިގަންނަވައިފިނަމަ ލަސްނުކުރައްވައި ފުލުހުންނަށް އަންގަވައިދެއްވުން އެދޭ ކަމަށެވެ.

ރާއްޖޭގެ ނޫހެއް ކަމަށްވާ ދައުރު ނޫހުން މިއަދު ރިޕޯޓުކޮށްފައިވާ ގޮތުގައި ހިންދޫ ދީނުގެ މި ފާދިރީ ރާއްޖެ އައިސްފައިވަނީ މިދިޔަ އޮގަސްޓު މަހުގެ ތެރޭގައި ޓޫރިސްޓު ވިސާގަ އެވެ. އޭނާއަކީ އިންޑިއާގައި ވެސް ފުޅާ ދާއިރާއެއްގައި އެކަން ކުރާ މީހެއް ކަމަށް އެނޫހުން ބުނެއެވެ.