އަމީނީ މަގު މަރާމާތު ކުރުމުގެ މަސައްކަތް ބާރު ސްޕީޑެއްގައި ކުރިޔަށް!

އަމީނީމަގު މާފަންނު ސްޓޭޑިއަމް ސަރަހައްދުގައި ތާރު އަޅާފައިވާ ހިސާބަށް ގެއްލުންވެފައި ވުމުގެ ސަބަބުން އެ ސަރަހައްދު މަރާމާތު ކުރުމުގެ މަސައްކަތް ބާރު ސްޕީޑެއްގައި ކުރިޔަށްދާކަން އެމަސައްކަތް ކުރަމުންދާ އާރްޑީސީން ހާމަކޮށްފި އެވެ.

އާރްޑީސީން މިއަދު ވަނީ މި މަސައްކަތުގެ އެންމެ ފަހުގެ އަދާހަމަ މައުލޫމާތު ހިއްސާކޮށްފައި އެވެ. އެގޮތުން އެކުންފުނިން ބުނީ އެ ސަރަހައްދު މަރާމާތު ކުރުމުގެ މަސައްކަތުގެ ތެރެއިން މިހާރު ކުރިއަށް ދަނީ އޭބީސީ ފަށަލަ އެޅުމާއި ކޮމްޕެކްޓް ކުރުމުގެ މަސައްކަތް ކަމަށެވެ.

ސަރުކާރުން ޒަމާނީ ފެންވަރަށް ތަރައްޤީކޮށް ތާރު އެޅި އަމީނީމަގުގެ ބައެއް ސަރަހައްދުތަކަށް ގެއްލުން ލިބިފައިވާތި އެސަރަހައްދު މަރާމާތު ކުރުމުގެ މަސައްކަތް އާރްޑީސީން ފެށީ މިމަހުގެ 11 ވަނަ ދުވަހު އެވެ.

އެގޮތުން ހަލާކުވެފައިވާ ސަރަހައްދުގެ ތާރުގަނޑު ނަގައި އަލުން ތާރު އެޅުމުގެ މަސައްކަތް ކުރުމަށް އެކުންފުނިން ވަނީ ނިންމާފައި އެވެ.

އަމީނީ މަގު ތާރު އަޅައިގެން ތަރައްޤީކުރުމުގެ މަސައްކަތް ފެށީ ކުރީ ސަރުކާރުން އާރްޑީސީއާއި ހަވާލުކޮށްގެންނެވެ. މި މަސައްކަތް ދިގުލައިގެން ގޮސް ނިމުނީ މިދިޔަ އަހަރުގެ ތެރޭގައި އެވެ. ނަމަވެސް މަސައްކަތް ނިމުނު އިރު އަމީނީ މަގު މާފަންނު ސްޓޭޑިއަމް ސަރަހައްދުގައި އެޅި ތާރުގަނޑު އޮތީ ވަރަށް ބޮޑަށް ހަލާކުވެފައި އެވެ.