ޓްރަމްޕު އެމެރިކާގެ ވެރިކަމާއި ހަވާލުވުން މިރޭ!

އެމެރިކާގެ ރިޔާސީ އިންތިހާބު ކާމިޔާބުކުރައްވި ޑޮނަލްޑް ޓްރަމްޕު އެމެރިކާގެ 47 ވަނަ ރައީސް ހުވާ މިރޭ ކުރައްވާނެ އެވެ.

އެގައުމުގެ 45 ވަނަ ރައީސްކަންވެސް ކުރެއްވި ޓްރަމްޕު ވެރިކަމާއި ހަވާލުވެވަޑައިގަތުމަށް ބާއްވާ ވެރިކަމުގެ ހުވާ ކުރެއްވުމުގެ ރަސްމިއްޔާތު ފެށުމަށް ތާވަލުކޮށްފައިވަނީ މިރޭ ރާއްޖެ ގަޑިން 10:00 ހާއިރު ކަމަށް ރިޕޯޓުތައް ބުނެއެވެ.

އެގޮތުން މީގެ ކުރިން އެގައުމުގެ ކެޕިޓަލް ބިލްޑިންގ ނުވަތަ ގާނޫނު ހަދާ މަޖިލީހުގެ އިމާރާތުގެ ބޭރުގައި ބާއްވަމުން ދިޔަ މި ރަސްމިއްޔާތު މިފަހަަރު ބޭއްވުމަށް ނިންމާފައިވަނީ އެބިލްޑިންގ ގެ ތެރޭގައި އެވެ. ސަބަބެއް ކަމަށްވަނީ މިއީ އެމެރިކާއަށްވެސް ފިނި މޫސުމަށްވުމެވެ.

މިއަދުގެ ރަސްމިއްޔާތުގައި މިހާރުގެ ރައީސް ޖޯ ބައިޑަން އާއި ނައިބު ރައީސް ކަމަލާ ހެރިސް ގެ އިތުރުން އެގައުމުގެ ވެރިކަން ކުރެއްވި ރައީސުންނަށްވެސް ޓްރަމްޕު ވަނީ ދައުވަތު ދެއްވާފައި އެވެ. މީގެ އިތުރުންވެސް ޓްރަމްޕް ވަނީ ޗައިނާގެ ލީޑަރު ޝީ ޖިންޕިން، އާޖެންޓީނާގެ ހާވިއާ މައިލީ އަދި އިޓަލީގެ ޖޯޖިއާ މެލޯނީ ފަދަ ދުނިޔޭގެ ބައެއް ލީޑަރުންނަށްވެސް ދައުވަތު ދެއްވާފަ އެވެ.

އަދި ހަމައެއާއި އެކު ޓްރަމްޕު ވަނީ އީލޮން މަސްކް، މެޓާގެ ވެރިޔާ މާކް ޒަކަބާގް އަދި ޓިކްޓޮކްގެ ޗީފް އެގްޒެކެޓިވް ޝައު ޒީ ޗީވް އަށްވެސް ޚާއްސަ ދައުވަތެއް ދެއްވާފައި ކަމަށް ރިޕޯޓުތައް ބުނެއެވެ.

އިންތިހާބީ ރައީސް ޓްރަމްޕް ވަނީ ވެރިކަމުގެ ފުރަތަމަ ދުވަހު ގާތްގަނޑަކަށް 100 އެއްހާ އެގްޒެކެޓިވް އޯޑަރުގައި ސޮއި ކުރައްވާނެ ކަމަށް ވައުދުވެވަޑައިގެންފައި އެވެ. ނަމަވެސް އެ އޯޑަރުތަކުގެ ތަފްސީލެއް އަދި ދީފައެއް ނުވެއެވެ.

މިއަދު ރައީސްކަމުގެ ހުވާ ކުރައްވާ ޓްރަމްޕު ވަނީ ރިޔާސީ އިންތިހާބުގައި ވާދަކުރެއްވީ މިހާރު އެގައުމުގެ ނައިބު ރައީސްއަކަށް ހުންނެވީ ކަމަލާ އެވެ. ނަމަވެސް ބޮޑު ނަތީޖާއަކުން ޓްރަމްޕު ވެރިކަން އަނބުރާ ހޯދި އިރު ފާއިތުވި 4 އަހަރަކީ ޓްރަމްޕުގެ އަމިއްލަ ދިރިއުޅުމުގައި އާއި ވިޔަފާރީގައި ވެސް ބޮޑެތި ގޮންޖެހުންތަކަކާއި ކުރިމަތިލާން ޖެހުނު 4 އަހަރެވެ. ކޯޓުތަކުގައި ޓްރަމްޕުގެ ބޮޑެތި މައްސަލަތަކެއް ކުރިޔަށް ދިޔައިރު ފާއިތުވި 4 އަހަރުގެ ތެރޭގައި ޓްރަމްޕު އަވަހާރަކޮށްލަން ދެތިން ފަހަރަކު ހަމަލާތަކެއް ވެސް ވަނީ ދީފައި އެވެ.