އޮޕަރޭޝަން ކުރަނގި މިއަދު މާލެ ސަރަހައްދުގައި!

ރާއްޖޭގައި އުޅޭ ބިދޭަސީންގެ މައުލޫމާތު އެއްކުރުމަށް ސަރުކާރުން ފަށާފައިވާ " އޮޕަރޭޝަން ކުރަނގި" ގެ ބޮޑު ހަރަކާތެއް މިއަދު މާލެ ސަރަހައްދުގައި ފަށައިފި އެވެ.

ދާހިލީ ވުޒާރާއިން ބުނީ މި ހަރަކާތްކުރިޔަށް ދާނީ މިއަދު ހެނދުނު 8:00 އިން ފެށިގެން އިރުއޮއްސި 6:00 އާ ހަމައަށް ކަމަށެވެ. މި މަސައްކަތުގައި އެވުޒާރާގެ 75 އޮފިޝަލުންގެ ޓީމެއް ހަރަކާތްތެރިވެ އެވެ.

އެވުޒާރާއިން ބުނީ މާލޭގައި "ކުރަނގި" ކުރިއަށް ގެންދާ އިރު، ތަޢުލީމީ ދާއިރާގައި މަސައްކަތްކުރާ ބިދޭސީންގެ އިތުރުން ބޮޑެތި ބައެއް ކުންފުނިތަކުގެ ބިދޭސީ މަސައްކަތްތެރިންގެ މަޢުލޫމާތު ވެސް އެއްކުރާނެ ކަމަށެވެ. އަދި މާލޭގެ އިތުރުން މި އޮޕަރޭޝަން މިއަދު ތިލަފުއްޓާއި ގުޅީފަޅުގައި ވެސް ކުރިއަށް ދާނެ ކަމަށް ވަނީ ބުނެފައި އެވެ.

ގަވައިދާ ހިލާފަށް އުޅޭ ބިދޭސީންގެ މައްސަލައަށް ހައްލެއް ގެނައުމަށްޓަކައި "އޮޕަރޭޝަން ކުރަނގި" ނަމުގައި ހާއްސަ މަސައްކަތެއް ސަރުކާރުން ފެށީ މިދިޔަ އަހަރުގެ މޭ މަހުގެ ތެރޭގައި އެވެ.މި އޮޕަރޭޝަންގެ ދަށުން ހިންމަފުށީގައި ގަވައިދާ ހިލާފަށް އުޅޭ ބިދޭސީންތައް ހޯދައި އެމީހުންގެ އިނގިލީގެ ނިޝާން ހޯދައި، ފޮޓޯ ނަގައި ނިޒާމުގެ ތެރެއަށް ވައްދާނެ އެވެ.