ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފަށާނީ އާދީއްތަ ދުވަހުން ފެށިގެން!

ފާއިތުވި 15 މަސްދުވަހު ޔަހޫދީ އިޒްރޭލުން ޣައްޒާގައި ހިންގަމުން ދިޔަ ގަތުލުއާންމު ނިމުމަކަށް ގެނައުމަށްޓަކައި ހަމަލާ ބަދަލުކުރުންތައް ހުއްޓާލުމަށް ހަމާސްއާއި އިސްރާއީލުން އެއްބަސްވި އެއްބަސްވުމަށް އަމަލުކުރަން ފަށާނީ މިމަހުގެ 19 ވަނަ ދުވަހު ކަމަށް މި އެއްބަސްވުމުގެ މެދުވެރިއެއްގެ ރޯލު އަދާކުރި ގަތަރުން ބުނެފި އެވެ.

މި އެއްބަސްވުމާއި ގުޅޭ މައުލޫމާތު ދެއްވުމަށް ގަތަރުގެ ބޮޑުވަޒީރު ޝެއިޚް މުހައްމަދު ބިން އަބްދުއްރަހްމާން ބިން ޖާސިމް އަލް ޘާނީ މިރޭ ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ގަތަރާއި މިސްރު އަދިއެމެރިކާ ގުޅިގެން ޣައްޒާގައި ހަނގުރާމަ ހުއްޓާލުމުގެ އެއްބަސްވުމެއް ގާއިމުކުރުމަށް ކުރި މަސައްކަތް ކާމިޔާބުވެފައިވާ ކަމަށެވެ. އަދި އެ އެއްބަސްވުމާއި އެކު އެއްބަސްވުމަށް ހަމާސްއާއި އިސްރާއިލުން އަމަލުކުރޭތޯ ބެލުުމުގެ ޒިންމާ އަދާކުރާނީ ގަތަރާއި މިސްރުން ކަމަށްވެސް ބޮޑުވަޒީރު ޝެއިޚް މުހައްމަދު ބިން އަބްދުއްރަހްމާން ބިން ޖާސިމް އަލް ޘާނީ ވިދާޅުވިއެވެ.

އެގޮތުން ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފަށާނީ ޖެނުއަރީ 19 ވާ އާދީއްތަ ދުވަހުކަން ބޮޑުވަޒީރު ޝެއިޚް މުހައްމަދު ބިން އަބްދުއްރަހްމާން ބިން ޖާސިމް އަލް ޘާނީ އިއުލާނުކުރެއްވި އެވެ.

އޭނާ އިތުރަށް ވިދާޅުވީ ފަލަސްތީނު ގައިދީންގެ ބަދަލުގައި އެއްބަސްވުމުގެ ފުރަތަމަ ފިޔަވަހީގައި އިސްރާއީލުގެ 33 އަސީރުން ދޫކޮށްލުމަށް ހަމާސް އިން ވަނީ އެއްބަސްވެފައި ކަމަށެވެ.

އެގޮތުން މިއަދު އެއްބަސްވުމަކަށް އާދެވުނު ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ ފިޔަވަހީގެ މުއްދަތަކީ 42 ދުވަސްކަންވެސް އޭނާ އިއުލާނުކުރެއްވި އެވެ.