ރާއްޖޭގައިހުރި އިންވެސްޓްމެންޓްގެ ފުރުޞަތުތަކުގެ ތަފްސީލް އަޒަރުބައިޖާނުގެ ވަފުދާއި ހިއްސާކޮށްފި

ރާއްޖޭގައިހުރި އިންވެސްޓްމެންޓްގެ ފުރުޞަތުތަކާ ބެހޭގޮތުން އަޒަރުބައިޖާނާއެކު ރާއްޖެއިން މަޝްވަރާކޮށްފިއެވެ.

މި މަޝްވަރާތައް ކޮށްފައިވަނީ އަޒަރުބައިޖާނު ސަރުކާރުގެ ހައި-ލެވެލް ވަފުދެއް ރާއްޖެއަށް މިހާރު ކުރަމުންދާ ދަތުރުފުޅުގެ ތެރެއިން މިއަދު ރާއްޖޭގައި ކުރިޔަށް ގެންދިޔަ ޚާއްސަ ބައްދަލުވުމުގައި އެވެ.

ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ އެކި ދާއިރާތަކުން ރާއްޖޭގައި ހުރި އިންވެސްޓްމަންޓް ފުރުސަތުތައް އަޒަރުބައިޖާނުގެ ވަފުދުގެ ބޭފުޅުންނާއި ހިއްސާކުރަން ޚާއްސަ ފޯރަމެއް ކުރިޔަށް ގެންގޮސްފައިވާ ކަމަށާއި އެ ފޯރަމުގައި އެކި މިނިސްޓްރީތަކާއި ސަރުކާރު ކުންފުނިތަކުން ވަނީ ރާއްޖޭގައި އިންވެސްޓް ކުރަން ހުރި ފުރުސަތުތަކާއި ގުޅޭ މައުލޫމާތު ހިމެނޭ ޕްރެޒެންޓޭޝަންތައް ހުށަހަޅާފައިވާ ކަމަށެވެ.

އެގޮތުން ވަފުދުގެ ބޭފުޅުންނަށް މައުލޫމާތު ފޯރުކޮށްދިން ދާއިރާތަކުގެ ތެރޭގައި އިޔާދަކުރަނިވި ހަކަތައިގެ ދާއިރާއިންނާއި، ތިމާވެށި، ބޯހިޔާވަހިކަމުގެ ދާއިރާ އާއި ރިއަލް އެސްޓޭޓް، ޓޫރިޒަމް އަދި އޭވިއޭޝަން ދާއިރާ ހިމެނޭކަން ބަޔާނުގައި ވަނީ ފާހަގަކޮށްފައެވެ.

އަޒަރުބައިޖާނުގެ އިސް އޮފިޝަލުން ރާއްޖެ ކުރައްވަމުން ގެންދަވާ ރަސްމީ ދަތުރުފުޅުގައި އިސްކޮށް ހުންނެވީ އަޒަރުބައިޖާނުގެ ޑެޕިއުޓީ ފޮރިން މިނިސްޓަރު މަމަދޯވް އެވެ. އެގައުމުގެ އިސް މި ވަފުތުގައި އަޒަރުބައިޖާން ސަރުކާރުގެ ކަމާބެހޭ ވުޒާރާތަކުގެ އިސް ބޭފުޅުންނާއި، އަޒަރުބައިޖާންގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޯމޯ)ގެ އިސްވެރިންނާއި އާއި ޕްރައިވެޓް ސެކްޓާގެ މަންދޫބުން ހިމެނިވަޑައިގަންނަވަ އެވެ.